Pune News : भाजप आमदार सातपुते यांच्या शाही विवाहाच्या चौकशीचे आदेश

एमपीसी न्यूज : भाजपचे माळशिरसचे आमदार राम सातपुते (BJP MLA Ram Satpute) यांच्या शाही विवाह सोहळ्याच्या चौकशीचे आदेश पुण्याचे पोलीस सहआयुक्त रवींद्र शिसवे (Pune Police) यांनी दिले आहेत. आमदार राम सातपुते यांचा विवाह रविवारी झाला. त्यांच्या विवाह सोहळ्यात 50 पेक्षा जास्त लोक होते, असा ठपका ठेवण्यात आला आहे. या प्रकरणी आता चौकशी करण्यात येत आहे.

विशेष म्हणजे या विवाह सोहळ्याला विधानसभेचे विरोधी पक्ष नेते आणि माजी मुख्यमंत्री देवेंद्र फडणवीस (Devendra Fadanvis) यांच्यासह अनेक भाजप नेत्यांनी (BJP Leader) आवर्जुन हजेरी लावली होती.

राज्यात कोरोनाचा संसर्ग (Coronavirus) कमी झाला असला तरी दुसरी लाट येणार असल्याची अंदाज वर्तवण्यात आला आहे. ‘दो गज की दूरी जरुरी’, ‘मास्क पेहनना जरूरी है’ असं देशाचे पंतप्रधान नरेंद्र मोदी (PM Narendra Modi) वारंवार सांगत आहेत. मात्र, भाजपच्याच नेत्यांना त्याचा विसर पडल्याचं आमदार राम सातपुते यांच्या विवाह सोहळ्याला जमलेल्या गर्दीवरून बोललं जात आहे.

विवाह सोहळ्यात  50 हून अधिक पाहुणे उपस्थित राहू नये, असा नियम आहे. मात्र, भाजपचे आमदार राम सातपुते यांच्या शाही विवाह सोहळ्यात गर्दी मावत नसल्याचं समोर आलं होतं. या विवाह सोहळ्यातील गर्दीचे फोटो आणि व्हिडिओ सोशल मीडियावरही व्हायरल झाले होतं. यावरून भाजपवर टीकेची झोडही उठली आहे. आता हे प्रकरण पोलीस स्टेशनमध्ये गेलं आहे. पुण्याचे पोलीस सहआयुक्त रवींद्र शिसवे यांनी या प्रकरणी चौकशीचे आदेश दिले आहे.

 

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.