Pavana Dam: पवना धरण 100 टक्के भरले

एमपीसी न्यूज : पवना धरण परिसरात झालेल्या जोरदार पावसामुळे धरण 99.98 टक्के भरले आहे. त्यामुळे पिंपरी-चिंचवडसह मावळवासीयांची पुढील वर्षभराची पाण्याची चिंता मिटली आहे. (Pavana Dam) आता दररोज पाणीपुरवठा कधी होईल याकडे पिंपरी- चिंचवडकरांचे लक्ष लागले आहे.

पिंपरी-चिंचवडसह मावळ भागातील विविध गावांचा पाण्याचा मुख्य स्रोत पवना धरण आहे. महापालिका सध्या धरणातून 510 एमएलडी पाणी उचलते. शहराला पाणीपुरवठा करण्यासाठी पवना नदीवरील रावेत – पुनावळे दरम्यान असलेल्या बंधा-यातून अशुद्ध जलउपसा करण्यात येतो. सेक्टर 23 निगडी येथे पाणी शुद्ध करुन शहरवासीयांना पुरवठा केला जातो. यंदा उष्णतेची लाट, पाण्याचा वापर वाढल्याने धरणातील पाणी झपाट्याने कमी झाले होते. त्यातच यंदा पावसानेही मोठी ओढ दिली होती.

जून महिन्यात पाऊस पडला नाही. त्यामुळे महापालिकेने दैनंदिन पाणीवापर अत्यंत काटकसरीने करावा. दैनंदिन पाणीवापर असाच सुरु राहिल्यास आणि पाऊस लांबणीवर गेल्यास तीव्र पाणीटंचाई निर्माण होण्याची शक्यता आहे. त्यासाठी महापालिकेने मोठ्या प्रमाणात पाणी कपात करावी,(Pavana Dam) अशी सूचना पाटबंधारे विभागाने महापालिका प्रशासनाला केली होती. त्यानुसार महापालिकेनेही आणखी पाणी कपात करण्याचे नियोजन सुरू केले होते.

परंतु, 1 जुलै पासून दमदार पावसाला सुरुवात झाली. झपाट्याने धरणातील पाणीसाठा वाढला. त्यामुळे वाढीव पाणीकपात टळली.(Pavana Dam) परंतु, जुलै महिन्याच्या शेवटच्या आठवड्यापासून पावसाने चांगलीच विश्रांती घेतली होती. त्यामुळे धरणात गतवर्षीपेक्षा कमी पाणीसाठा झाला होता. ऑगस्टमध्ये पावसाने पुन्हा जोरदार हजेरी लावली. त्यामुळे धरणातील पाणीसाठ्यात वाढ झाली. धरणातून पाण्याचा विसर्ग देखील करण्यात आला. आजमितीला धरणात 99.98 टक्के पाणीसाठा आहे. त्यामुळे पिंपरी-चिंचवडसह मावळवासीयांची पुढील वर्षभराची पाण्याची चिंता मिटली आहे.

Pune accident: पुण्यात कंटेनरची दुचाकीला धडक, शाळेत निघालेल्या दोन मुलींचा जागीच मृत्यू

पवना धरणातील परिस्थिती!

# गेल्या 24 तासात झालेला पाऊस = 28 मि.मि.

# 1 जूनपासून झालेला पाऊस = 2, 157 मि.मि.

# गेल्या वर्षी आजच्या तारखे पर्यंत झालेला एकूण पाऊस = 2049 मि.मि.

# धरणातील सध्याचा पाणीसाठा = 99.98 टक्के

# गेल्या वर्षी आजच्या तारखेचा धरणातील पाणीसाठा = 96.62 टक्के