Pimpri: कोरोनामुळे ‘कापूर’चे भाग वधारले
एमपीसी न्यूज – प्रत्येक व्यक्ती आपल्या देवताला प्रसन्न करण्यासाठी, सुखसमृद्धीसह श्रद्धेपोटी कापराचा वापर करून देवपूजा करून समाधान मिळवण्याचा प्रयत्न करतो. मात्र, आता कोरोना व्हायरसला दूर ठेवण्यासाठी कापूरचा उपयोग होत असल्याने लोकांकडून खरेदी वाढली आहे. कापराच्या उपयोगाची माहिती सोशल मीडियावर प्रसारित होत आहे. त्यामुळेच ठोकमध्ये प्रति किलो 750 रुपये भाव असलेले देशी (दगड्या) कापूरचे भाव किरकोळमध्ये 1400 रुपये किलोवर पोहोचले आहे. दुकानदारही मागणीनुसार भाव वाढवून नफा कमवीत आहेत.
कापराच्या सुगंधाने जीवाणू, विषाणू, लहान कीटक नष्ट होतात. त्यामुळे वातावरण शुद्ध राहते आणि आजार दूर राहतात, असे वैज्ञानिक संशोधनामुळे सिद्ध झाले आहे. याशिवाय कापराच्या सुगंधाने मनात एक नवचैतन्य निर्माण होते. सर्दी – पडसे व्हायरसची लक्षणे असताना रुमालात 3 ते 4 कापूर एकत्र करून त्याचा वास घेतल्याने सर्दी – पडसे होत नाही, असे आयुर्वेद तज्ज्ञांनी सांगितल्यानुसार कोरोना व्हायरसचा संसर्ग होऊ नये म्हणून लोकांनी कापराचा उपयोग करणे सुरू केले आहे.
कापराच्या प्रभावाने घरातील वातावरणात सकारात्मक ऊर्जा निर्माण होते आणि त्याच्या सुगंधाने आपल्या विचारातही सकारात्मकता येते. खोकल्याकरिता आयुर्वेदिक कंपन्या कापराचा उपयोग करतात. त्यामुळे कापूर संरक्षणकर्ता असल्याचा समज लोकांमध्ये आहे.
भारतीय मानसिकतेनुसार नागरिकांकडून कापराची खरेदी वाढली आहे. अनेकजण कापूर रुमालात ठेवून प्रतिबंधक उपाय म्हणून गर्दीच्या ठिकाणी सुगंध घेत आहेत. याच कारणामुळे विक्री वाढली आहे. कापरचा सीझन जून – जुलैपासून दिवाळीपर्यंत असतो. तेव्हा भाव कमी – जास्त होत असतात. पण आता कोरोना व्हायरसमुळे बाजारपेठेत मागणी असल्याने आणि भाव वाढले आहेत. पण उत्पादकांकडे मागणी वाढली नाही. ठोकमध्ये खुला देशी (दगड्या) कापराचे भाव 750 रुपये किलो तर डबीत पॅकिंग छोट्या वड्याचा (टॅबलेट) कापूर 690 रुपये किलो आहे.
किरकोळमध्ये दीडपट भावात नेहमीच विक्री होते. कदाचित मागणीमुळे दुकानदार डबीवरील प्रिंटिंगच्या भावात अथवा जास्त भावात विक्री करीत असेल, पण त्याची अधिकृत माहिती नाही. पूर्वी चिकनगुनिया आजारात डासांचा प्रादुर्भाव थांबविण्यासाठी लोकांनी कापराचा उपयोग जास्त प्रमाणात केला होता. कापूर उद्योगाचा लघु उद्योगात समावेश होतो. मध्यतंरी कच्च्या मालाचे भाव वाढल्याने भाव 1100 रुपयांवर पोहोचले होते.