Pimpri: कोरोना नियंत्रणासाठी कंटेन्मेंट झोनमध्ये प्रभावीपणे उपाययोजना राबवा; विभागीय आयुक्तांच्या महापालिकेला सूचना
pimpri-effectively-implement-measures-in-the-containment-zone-for-corona-control-advice-to-the-municipal-corporation-by-divisional-commissioners
एमपीसी न्यूज – पिंपरी-चिंचवड महापालिका क्षेत्रातील इंदिरानगर वसाहत (चिंचवड स्टेशन ) व रुपीनगर (तळवडे), भोसरी या प्रतिबंधित क्षेत्राला विभागीय आयुक्त डॉ. दीपक म्हैसेकर यांनी आज (बुधवारी) भेट देवून पाहणी केली. कोरोना नियंत्रणासाठी प्रतिबंधित क्षेत्रात प्रभावीपणे उपाययोजना राबवाव्यात, अशा सूचना यावेळी डॉ. म्हैसेकर यांनी केल्या.
प्रतिबंधित क्षेत्राच्या पाहणी दरम्यान महापालिका आयुक्त श्रावण हर्डीकर, आरोग्य वैद्यकीय अधिकारी डॉ. के. अनिल रॉय, डॉ. पी.एच.ताडे, डॉ.रामनाथ बच्छाव, क्षेत्रीय अधिकारी आशादेवी दुरगुडे, सहायक आरोग्य अधीकारी एम. एम. शिंदे तसेच संबंधित वैद्यकीय अधिकारी, परिचारिका, कर्मचारी उपस्थित होते.
पिंपरी- चिंचवडमधील कोरोना बाधित रुग्णांची संख्या वाढू नये, यासाठी कंटेन्मेंट क्षेत्रात कडक निर्बंध राबवावेत. तसेच प्रशासनाच्या वतीने सर्व उपाययोजनांची अंमलबजावणी करुन रुग्ण वाढू नयेत यासाठी दक्षता घ्यावी, अशा सूचनाही त्यांनी महापालिका व आरोग्य विभागाच्या अधिकाऱ्यांना केल्या.
विभागीय आयुक्त डॉ. म्हैसेकर म्हणाले, कोरोना बाधित रुग्णांच्या संपर्कात आलेल्या नागरिकांच्या तपासणीवर भर द्यावा. प्रतिबंधीत क्षेत्रातील कोविड 19 सदृश्य लक्षणे आढळणा-या नागरिकांच्या तपासणीसाठी या परिसरा नजीक कोविड फ्लू सेंटर सुरु करावे.
याबरोबरच घरोघरी जावून नागरिकांचे आरोग्यविषयक सर्वेक्षण करावे. सर्वेक्षण करतांना ज्येष्ठ नागरिक व उच्च रक्तदाब, श्वसनाशी संबंधीत आजार असणाऱ्या व्यक्तींच्या बाबतीत विशेष दक्षता घ्यावी. या व्यक्तींच्या तपासणीसाठी शिबीर घ्यावे, असे सांगून प्रतिबंधीत क्षेत्रातील नागरिकांना मुलभूत सोयी- सुविधा पुरविण्यासाठी नियोजन करावे.
सार्वजनिक स्वच्छतागृहांच्या साफ-सफाईवर भर द्यावा, येथील नागरिकांना मास्क व सॅनिटायझर पुरवावे. जीवनावश्यक वस्तूंचा पुरवठा घरपोच करावा, जेणेकरून येथील नागरिक घराबाहेर पडणार नाहीत. गृहभेटीव्दारे केलेल्या वैद्यकीय तपासणीच्या नोंदी वेळोवळी घेण्यात याव्यात, असेही त्यांनी सांगितले.
महानगरपालिका क्षेत्रातील प्रतिबंधित क्षेत्रात उपाययोजना राबवण्यासाठी आवश्यकतेनुसार प्रशासनाच्या वतीने मदत करण्यात येईल, असे सांगून प्रतिबंधित परिसरातील नागरिकांना निश्चित केलेल्या कालावधीत अत्यावश्यक सेवे व्यतिरिक्त कोणालाही ये-जा करता येणार नाही, याची दक्षता घ्यावी. येथील रहिवाशांना भाजीपाला, दूध अशा जीवनावश्यक वस्तू त्याच ठिकाणी उपलब्ध करुन देण्याची व्यवस्था करावी, असेही ते म्हणाले.
