Pimpri: ‘खेलो इंडिया युथ गेम्स’साठी महापालिकेने दिले 36 लाख रुपये

बालेवाडीमध्ये जानेवारीत होणार स्पर्धा

0 87

एमपीसी न्यूज – केंद्र आणि राज्य शासनाच्या संयुक्त विद्यमाने 9 ते 20 जानेवारी 2019 या कालावधीत ‘खेलो इंडिया युथ गेम्स-2019 ‘ होणार आहेत. बालेवाडीत होणा-या या स्पर्धेसाठी पिंपरी-चिंचवड महापालिका पावणेछत्तीस लाख रुपये खर्च करणार आहे. स्थायी समिती सभेत आयत्यावेळी या विषयाला मंजुरी देण्यात आली.

HB_POST_INPOST_R_A

आगामी ऑलंपिक आणि आशियाई स्पर्धेच्या तयारीच्या दृष्टीने गुणवंत व उदयोन्मुख खेळाडूंना प्रोत्साहन मिळावे आणि येत्या काळात हिंदुस्थान खेळामध्ये महाशक्ती व्हावा यासाठी केंद्र शासनातर्फे खेलो इंडिया युथ गेम्स आयोजित करण्यात येतात. त्याअनुषंगाने केंद्र आणि महाराष्ट्र शासन यांच्या संयुक्त विद्यमाने 17 वर्षाखालील ‘खेलो इंडिया युथ गेम्स-2019’ चे आयोजन करण्यात येणार आहे. 9 ते 20 जानेवारी 2019 या कालावधीत होणारी ही द्वितीय स्पर्धा बालेवाडी येथील शिवछत्रपती क्रीडा संकूल येथे आयोजित करण्याचे निश्चित करण्यात आले आहे.

या स्पर्धेत अ‍ॅथलेटिक्स, आर्चरी, बॅडमिंटन, बॉक्सिंग, टेनिस, जिमनॅस्टीक, ज्यूदो, शुटींग, जलतरण, टेबल टेनिस, वेटलिफ्टींग, कुस्ती, बास्केटबॉल, फुटबॉल, हॉकी, कबड्डी, खो-खो आणि व्हॉलीबॉल आदी विविध अठरा खेळ होणार आहेत. या स्पर्धेत सुमारे एक हजार खेळाडू, तांत्रिक अधिकारी आणि स्वयंसेवक सहभागी होणार असून स्पर्धेचे उद्घाटन पंतप्रधान नरेंद्र मोदी, मुख्यमंत्री देवेंद्र फडणवीस, तसेच केंद्रीय आणि राज्याचे क्रीडामंत्री यांच्या उपस्थितीत होणार आहे. या क्रीडा स्पर्धेतील काही कामांची जबाबदारी पुणे विभागीय आयुक्त कार्यालयातर्फे पिंपरी-चिंचवड महापालिकेकडे सोपविण्यात आली आहे.

त्यामध्ये बालेवाडी क्रीडा संकुलातील फायर हायड्रंट सिस्टीम दुरूस्त करणे, स्पर्धा कालावधीत एक वाहन आणि तज्ज्ञ पथकासह अग्निशामक प्रतिबंध व्यवस्था सुसज्ज करणे, क्रीडा संकुलात होणा-या कच-याचे यवस्थापन करणे, त्यासाठी आवश्यक 5 मोठे आणि 50 लहान डस्टबीन, तसेच हा कचरा उचलण्यासाठी 1 मोठे व 10 लहान वाहने आणि 50 स्वच्छता कर्मचारी पुरविणे, चार मुव्हेबल टॉयलेट उपलब्ध करणे, क्रीडा संकुलातील पथदिव्यांची दुरूस्ती करणे आणि नूतनीकरण करणे आदी कामांचा समावेश आहे. त्यासाठी महापालिकेला 35 लाख 73 हजार रुपये इतका खर्च येणार असून या खर्चाला स्थायी समिती सभेत ऐनवेळी मंजूरी देण्यात आली.

HB_POST_END_FTR-A3
HB_POST_END_FTR-A4
HB_POST_END_FTR-A1
%d bloggers like this: