Pimpri: ‘अ’ क्षेत्रीय कार्यालय हद्दीत सर्वाधिक 526 सक्रिय रुग्ण, जाणून घ्या आपल्या भागातील अ‍ॅक्टिव्ह रुग्ण
Pimpri: Maximum 526 active patients in 'A' field office limits, how many active patients in your area? शहरातील सर्वच भागात कोरोनाचे रुग्ण सापडत आहेत. झोपडपट्टी, गावठाण भागात रुग्ण वाढ होताना दिसून येत आहे.
एमपीसी न्यूज- पिंपरी-चिंचवड शहराला कोरोनाने विळखा घातला आहे. मागील काही दिवसांपासून रुग्ण वाढीचे उच्चांक होत आहेत. महापालिकेच्या ‘अ’ क्षेत्रीय प्रभाग कार्यालयाच्या हद्दीत सर्वाधिक 526 सक्रिय रुग्ण आहेत. हा प्रभाग कोरोना हॉटस्पॉट आहे. तर, सर्वांत कमी म्हणजेच 115 रुग्ण ‘ड’ क्षेत्रीय प्रभाग कार्यालयाच्या हद्दीत आहेत. महापालिकेने मंगळवारी रात्री दिलेल्या नकाशानुसारची ही आकडेवारी आहे. आज आत्तापर्यंत 28 जणांचे रिपोर्ट पॉझिटिव्ह आले आहेत. दरम्यान, शहरातील आजपर्यंत रुग्ण संख्या 5211 झाली आहे.
शहरात 10 मार्च रोजी पहिला रुग्ण आढळला होता. तेव्हापासून शहरातील 5211 जणांना आतापर्यंत कोरोनाची लागण झाली आहे. त्यापैकी 3157 रुग्ण बरे होऊन घरी गेले आहेत. शहरातील 1989 सक्रिय रुग्णांवर रुग्णालयात उपचार सुरु आहेत. तर, 67 जणांचा आजपर्यंत कोरोनामुळे मृत्यू झाला आहे.
शहरातील सर्वच भागात कोरोनाचे रुग्ण सापडत आहेत. झोपडपट्टी, गावठाण भागात रुग्ण वाढ होताना दिसून येत आहे. शहरातील रुग्णसंख्या पाच हजार पार झाली असून जुलैअखेरपर्यंत 10 हजार रुग्ण होण्याची शक्यता प्रशासनाने वर्तविली आहे.
महापालिकेकडून शहरात कोरोनाचे किती सक्रिय रुग्ण आहेत. त्याबाबतची सविस्तर माहिती असलेला क्षेत्रीय कार्यालनिहाय नकाशा दररोज प्रसिद्ध केला जातो.
मंगळवारी रात्री प्रसिध्द केलेल्या नकाशानुसार संभाजीनगर, मोहननगर, आनंदनगर, चिंचवडस्टेशन, आकुर्डी, प्राधिकरण परिसर येत असलेल्या ‘अ’ प्रभागाच्या हद्दीत सर्वाधिक 526 तर त्याखालोखाल ‘इ’ कार्यालयाच्या हद्दीत 301 सक्रिय रुग्ण आहेत.
क्षेत्रीय कार्यालयानिहाय सक्रिय रुग्ण संख्या !
‘अ’ – क्षेत्रीय कार्यालयाअंतर्गत येत असलेल्या संभाजीनगर, मोहननगर, आनंदनगर, चिंचवडस्टेशन, आकुर्डी, प्राधिकरण, आनंदनगर, भाटनगर भागात सर्वाधिक 526 सक्रिय रुग्ण आहेत. त्यामध्ये आनंदनगर झोपडपट्टीतील सर्वाधिक रुग्णांचा समावेश आहे.
‘ब’ – क्षेत्रीय कार्यालयाअंतर्गत येत असलेल्या रावेत, किवळे-विकासनगर, बिजलीनगर, चिंचवडेनगर, चिंचवड प्रभागात 155 सक्रिय रुग्ण आहेत.
‘क’ – क्षेत्रीय कार्यालयाअंतर्गत येत असलेल्या नेहरूनगर, खराळवाडी, अजमेरा, बोऱ्हाडेवाडी, धावडेवस्ती, इंद्रायणीनगर भागात कोरोनाचे 214 रुग्ण आहेत.
‘ड’ – क्षेत्रीय कार्यालयाअंतर्गत येत असलेल्या वाकड, पिंपळेनिलख, पिंपळेसौदागर, पिंपळेगुरव भागात कोरोनाचे सर्वांत कमी म्हणजेच 115 सक्रिय रुग्ण आहेत.
‘इ’ – क्षेत्रीय कार्यालयाअंतर्गत येत असलेल्या भोसरी, गवळीनगर, चऱ्होली, दिघी भागात कोरोनाचे 301 रुग्ण आहेत. च-होली, दिघी भागातील रुग्णांची संख्या जास्त आहे.
‘फ’ – क्षेत्रीय कार्यालयाअंतर्गत येत असलेल्या चिखली, कृष्णानगर, तळवडे-रुपीनगर, यमुनागनर, निगडी गावठाण, सेक्टर क्रमांक 22 या प्रभागात कोरोनाचे 178 रुग्ण आहेत.
‘ग’ – क्षेत्रीय कार्यालयाअंतर्गत येत असलेल्या पिंपरीगाव, थेरगाव, गणेशनगर, रहाटणी भागात कोरोनाचे 214 सक्रिय रुग्ण आहेत.
‘ह’ – क्षेत्रीय कार्यालयाअंतर्गत येत असलेल्या संत तुकारामनगर, महात्माफुलेनगर, दापोडी, फुगेवाडी, कासारवाडी, नवी सांगवी, सांगवी भागात कोरोनाचे 238 सक्रिय रुग्ण आहेत. त्यामध्ये दापोडी परिसरात सर्वाधिक रुग्णांची नोंद आहे. तर, आज बुधवारी साडेदहा वाजेपर्यंत 28 जणांना लागण झाली आहे. शहरात एकूण 1989 सक्रिय रुग्ण आहेत. त्यांच्यावर महापालिका, खासगी रुग्णालयात उपचार सुरु आहेत.
