Pimpri news: कोरोना काळात काम करणाऱ्या अधिकारी, कर्मचाऱ्यांना पालिका देणार दैनंदिन 150 रुपये प्रोत्साहन भत्ता
पिंपरी-चिंचवड शहरात 10 मार्च रोजी कोरोनाचा पहिला रुग्ण आढळला होता. मागील सहा महिन्यांपासून पालिकेचे अधिकारी, कर्मचारी कोरोनाविरोधातील लढाई लढत आहेत.
एमपीसी न्यूज – कोरोनामुळे उद्भवलेल्या गंभीर परिस्थितीत देखील जीवाची पर्वा न करता कामावर हजर राहून आपली जबाबदारी सक्षमपणे पार पाडल्याबद्दल अधिकारी, कर्मचारी व वैद्यकीय कर्मचारी यांना दैनंदिन 150 रुपये प्रोत्साहन भत्ता देण्यात येणार असल्याची माहिती महापौर उषा ढोरे यांनी दिली.
पिंपरी-चिंचवड महापालिकेच्या कार्यक्षेत्रात कोरोना (कोविड-19) विषाणूचा वाढत्या संसर्गाला अटकाव करण्यासाठी विविध प्रतिबंधात्मक उपाययोजना राबविल्या जात आहेत. या पार्श्वभूमीवर कर्मचा-यांना येणे-जाणे, जेवण-खाण इत्यादींसाठी हा प्रोत्साहन भत्ता देण्यात येणार असल्याचे महापौर ढोरे यांनी सांगितले.
दरम्यान, पिंपरी-चिंचवड शहरात 10 मार्च रोजी कोरोनाचा पहिला रुग्ण आढळला होता. मागील सहा महिन्यांपासून पालिकेचे अधिकारी, कर्मचारी कोरोनाविरोधातील लढाई लढत आहेत. अनेक अधिकारी, कर्मचारी बाधित झाले आहेत.