Pimpri News: नवीन भोसरी, जिजामाता, आकुर्डी, थेरगाव रुग्णालयांमध्ये महापालिका उभारणार ऑक्सिजन जनरेटर प्लांट

सत्तारुढ पक्षनेते नामदेव ढाके यांची माहिती

एमपीसी न्यूज – शहरातील ऑक्सिजनच्या कमतरता व भविष्यातील ऑक्सिजनची गरज लक्षात घेवून ‍ पिंपरी- चिंचवड महापालिकेच्या नव्याने उभारण्यात आलेल्या चार रुग्णालयांमध्ये ऑक्सिजन जनरेटर प्लांट बसविण्यात येत आहेत. भोसरी, जिजामाता, आकुर्डी याठिकाणी 960 एलपीएम व थेरगाव रुग्णालयात 1050 एलपीएम क्षमतेचे ऑक्सिजन जनरेटर प्लांट बसविण्यात येत असल्याची माहिती सत्तारुढ पक्षनेते नामदेव ढाके यांनी दिली.

कोरोना साथीच्या काळात देशाच्या बर्‍याच भागात लोकांना ऑक्सिजनच्या अभावामुळे आपला जीव गमावावा लागत आहे. यावर उपाय म्हणून केंद्र शासनाच्या माध्यमातून मोठया प्रमाणात ऑक्सिजन जनरेटर प्लांट बसविण्यात येत आहेत. तसेच, महाराष्ट्रामध्ये ऑक्सीजनची गरज ओळखून आतापर्यंत जवळपास तीनशे ऑक्सिजन जनरेटर प्लांट बसविण्याचे नियोजन करण्यात आलेले आहे.

त्याअनुषंगाने राज्यात जिल्हा परिषद, महानगरपालिका, नगरपरिषद अशा स्थानिक स्वराज्य संस्थांच्या व शासनाच्या रुग्णालयांमध्ये हे प्लांट बसविण्यात येणार आहे. शहरातील ऑक्सिजनच्या कमतरता व भविष्यातील ऑक्सीजनची गरज लक्षात घेवून ‍पिंपरी-चिंचवड महापालिकेच्या माध्यमातून देखील भोसरी, जिजामाता, आकुर्डी व थेरगाव या चार नव्याने उभारण्यात आलेल्या रुग्णालयांमध्ये ऑक्सिजन जनरेटर प्लांट बसविण्यात येत आहेत.

_MPC_DIR_MPU_II

ऑक्सिजन प्लांट निर्मीती करणा-या कंपनीकडे ऑक्सिजन प्लांटची मागणी दिवसेंदिवस वाढू लागल्याने पुढे याचीही कमतरता पडण्याची शक्यता नाकारता येत नाही. ही बाब लक्षात घेवून महापालिकेने तातडीने ऑक्सिजन जनरेटर प्लांट बसविण्याचा निर्णय घेतला आहे.

‍सद्यस्थितीमध्ये शहरात ऑक्सिजनच्या कमतरतेमुळे रुग्णांची धावाधाव होत आहे. ऑक्सिजनच्या अभावामुळे राज्यात अनेक दुर्घटना घडतांना दिसून येत आहे. भविष्यामध्ये शहरात अशाप्रकारच्या घटना घडू नयेत, यासाठी वेळीच उपाययोजना करणे अत्यंत गरजेचे आहे.

त्याअनुषंगाने महापालिकेच्या नव्याने उभारण्यात आलेल्या भोसरी, जिजामाता, आकुर्डी याठिकाणी 960 एलपीएम व थेरगाव रुग्णालयात 1050 एलपीएम क्षमतेचे ऑक्सिजन जनरेटर प्लांट बसविण्यात येत आहेत. या चारही रुग्णालयांच्या माध्यमातून जवळपास 450 ऑक्सिजन बेड व 50 व्हेंटीलेटर बेडची व्यवस्था करण्यात येत आहे. यासाठी हा प्लांट उपयुक्त ठरणार आहे.

ऑक्सिजन तयार करणा-या कंपन्यांकडे दिवसेंदिवस मोठया प्रमाणात मागणी वाढत असल्याने या कंपन्यांकडून शहरातील रुग्णालयांना ऑक्सिजन पुरवठा करण्यासाठी विलंब होण्याची शक्यता आहे. या परिस्थितीचा विचार करून भोसरी, जिजामाता, आकुर्डी व थेरगाव या चार ठिकाणी ऑक्सिजन जनरेटर प्लांट बसविल्यामुळे ऑक्सिजनचा कायमचा प्रश्न मिटणार आहे. यामुळे मोठ्या प्रमाणात ऑक्सिजनची बचत होणार आहे, अशी माहिती सत्तारुढ पक्षनेते नामदेव ढाके यांनी दिली.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.