Pimpri News: उत्तर प्रदेशातील वाढत्या महिला अत्याचाराविरोधात राष्ट्रवादी महिला काँग्रेसचे शनिवारी राज्यव्यापी आंदोलन

एमपीसी न्यूज – उत्तर प्रदेश राज्यात महिलांवरील वाढत्या अत्याचाराच्या विरोधात राष्ट्रवादी महिला काँग्रेसच्या वतीने उद्या (शनिवारी) राज्यभर तीव्र निदर्शने करण्यात येणार आहेत.

महिला प्रदेशाध्यक्षा रुपाली चाकणकर यांच्या नेतृत्वाखाली हे आंदोलन करण्यात येणार आहे. नियोजित कार्यक्रमानुसार सकाळी 11.30 वाजता प्रत्येक जिल्हा आणि शहरातील मुख्य टपाल कार्यालयाबाहेर घंटानाद करण्यात येणार आहे.

निदर्शने करत टपाल मास्टर यांना महिला कार्यकर्त्यांनी मुख्यमंत्री अजय बिष्ट यांच्या नावे लिहिलेली पत्रे त्यांच्यापर्यंत पाठविण्यासाठी दिली जातील.

महिला प्रदेशाध्यक्षा रुपाली चाकणकर या पुणे येथील लक्ष्मी रोड, सिटी पोस्ट टपाल कार्यालयाबाहेर हे आंदोलन करणार आहेत.

उत्तर प्रदेशातील महिलावरील अत्याचार दिवसेंदिवस वाढत असून त्याबाबत अजय बिष्ट सरकार गंभीर नाही. त्यामुळेच त्यांचे योगी आदित्यनाथ हे नाव न वापरता त्यांच्या मूळ नावे त्यांना पत्रे दिली आहेत. योगी हा शब्द फार जबाबदारीचा असून ही जबाबदारी पार पाडण्यास अजय बिष्ट सक्षम नसल्यामुळे त्यांचा तसा उल्लेख या पत्रात टाळला आहे.

फक्त शहरांची नावे बदलण्यातच हे मुख्यमंत्री मश्गुल असून त्यांना महिलांच्या सुरक्षेचे काहीही घेणेदेणे नाही. लहान मुली, युवती, 50 वर्षीय महिला देखील या राज्यात सुरक्षित नाहीत.

त्यामुळे देशाची प्रतिष्ठा धोक्यात आली आहे. नामुष्की सहन करावी लागत आहे, अशा आशयाची ही पत्रे लिहिली असून त्याचा भला मोठा गठ्ठा महाराष्ट्रातून जाणार आहे, असे चाकणकर यांनी सांगितले.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.