Pimpri News : सर्वोच्च न्यायालयात वकील का दिला नाही? राज्य सरकारने खुलासा करावा – महेश लांडगे

एमपीसी न्यूज – ओबीसी समाजाचा विश्वासघात करून ओबीसी आरक्षण घालविणाऱ्या आघाडी सरकारच्या विरोधात भारतीय जनता पक्षातर्फे उद्या 15 सप्टेंबर रोजी राज्यभर आंदोलन करण्यात येणार आहे, अशी माहिती शहराध्यक्ष, आदार महेश लांडगे यांनी मंगळवारी दिली.

आमदार लांडगे म्हणाले की, गेले सहा महिने आघाडी सरकार ओबीसी समाजाच्या राजकीय आरक्षणाबाबत टोलवाटोलवी करत आहे. ओबीसी समाजाचा इम्पिरीकल डेटा गोळा करण्यासाठी तातडीने कार्यवाही सुरू करा, असे भारतीय जनता पक्षाच्या नेतृत्वाने राज्य सरकारला सातत्याने सांगितले आहे.

मात्र, आघाडी सरकारने गेल्या सहा महिन्यांत काही हालचालीच केल्या नाहीत. इम्पिरीकल डेटा गोळा करण्यासाठी नेमलेल्या मागासवर्गीय आयोगाला आघाडी सरकारने निधीही दिला नाही. या हलगर्जीचा परिणाम ओबीसी आरक्षणाशिवाय 5 स्थानिक स्वराज्य संस्थांच्या निवडणुका जाहीर होण्यात झाला आहे.

सत्ताधारी पक्षातील वजनदार गटाला पुढील वर्षी होणाऱ्या महापालिका, नगरपालिका, जिल्हा परिषद निवडणुका ओबीसी समाजाला आरक्षण न देताच घ्यावयाच्या असल्याने राज्य सरकारने सर्वोच्च न्यायालयात ओबीसी आरक्षणाची बाजू प्रभावीपणे मांडली नाही. राज्य सरकारने सर्वोच्च न्यायालयात वकिलच उभा केला नाही, असे सत्ताधारी महाविकास आघाडीतील काँग्रेस पक्षाचे प्रदेशाध्यक्ष सांगतात.

विधी व न्याय खात्याची जबाबदारी सांभाळणारे मुख्यमंत्री ठाकरे यांनी व आघाडी सरकारचे ‘जनक’ असलेल्या शरद पवार यांनी नाना पटोले यांच्या आरोपावर खुलासा करावा, असेही आमदार लांडगे यांनी म्हटले आहे. आघाडी सरकारच्या विरोधात भारतीय जनता पक्षातर्फे उद्या तालुका पातळीपर्यंत आंदोलन केले जाईल, असेही लांडगे यांनी नमूद केले.

-MPC-BOTTOM-BANNER-I

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

.