Pimpri : ‘सोशल मिडीया एक्स्पर्ट’चा फेटाळलेला प्रस्ताव पुन्हा स्थायी समोर

एमपीसी न्यूज – पिंपरी-चिंचवड महापालिकेमार्फे शहर परिवर्तन कार्यालयांतर्गत सिटीझन एन्गेजमेंट कार्यक्रम आणि सोशल मिडीया कॅम्पेन राबविण्याचे काम अधिक प्रभावीपणे राबविण्यासाठी ‘सोशल मिडीया एक्स्पर्ट’ नेमणुकीचा भाजप सदस्यांच्या विरोधामुळे फेटाळलेला प्रस्ताव पुन्हा स्थायी समिती समोर आला आहे. माहिती व तंत्रज्ञान विभागाने चलाखी करत ‘सोशल मिडीया एक्स्पर्ट’ नेमण्याचे अधिकार आयुक्तांना देण्यात यावेत अशी दुरुस्ती करुन तोच प्रस्ताव स्थायी समिती समोर ठेवला आहे.

महापालिकेतर्फे राबविण्यात येणा-या विविध प्रकल्पांच्या कामकाजांसाठी शहर परिवर्तन कार्यालय (सिटी ट्रान्फॉर्मेशन ऑफीस तथा सीटीओ) स्थापन करण्यात आली आहे. या कार्यालयामार्फत विविध माध्यमांचा उपयोग करून सिटीझन एन्गेजमेंट कार्यक्रम आणि सोशल मिडीया कॅम्पेन राबविण्यात येणार आहे. शहराच्या विकासात नागरिकांना अंतर्भूत करून घेणे, नागरिकांची, तज्ज्ञांची मते जाणून घेऊन सर्वेक्षण करणे आदी कामांचा समावेश आहे. त्यासाठी सोशल मिडीयाचा मोठ्या प्रमाणात उपयोग करण्यात येत आहे.

हे कामकाज अधिक प्रभावीपणे राबविण्यासाठी ‘सोशल मिडीया एक्स्पर्ट’ म्हणून अमोल देशपांडे यांची नेमणूक केली जाणार होती. सहा महिने कालावधीसाठी त्यांची नेमणूक असणार होती. देशपांडे यांना दरमहा सत्तर हजार रुपये इतके मानधन देण्यात येणार होते. तथापि, सत्ताधारी भाजपमध्ये या विषयावरुन मतमतांतरे होती. अनेक भाजपच्या स्थायीतील सदस्यांनी प्रस्तावाला विरोध केला. त्यामुळे 28 फेब्रुवारीच्या सभेत हा प्रस्ताव फेटाळण्यात आला होता.

आता माहिती व तंत्रज्ञान विभागाचे प्रमुख निळकंठ पोमण यांनी चलाखी करत ‘सोशल मिडीया एक्स्पर्ट’ नेमण्याचे अधिकार आयुक्तांना देण्यात यावेत अशी दुरुस्ती केली. तोच प्रस्ताव पुन्हा आज (गुरुवारी) होणा-या स्थायी समिती समोर मान्यतेसाठी ठेवला आहे. दरम्यान, या प्रस्तावाला विरोधी पक्षनेते नाना काटे, स्थायीचे सदस्य मयूर कलाटे यांनी विरोध दर्शविला आहे.