Pune News : शून्य कचरा नियोजनासाठी पुणे महानगरपालिकेचा ‘फिलिपिन्स’मध्ये गौरव
एमपीसी न्यूज : शाश्वत पर्यायांचा वापर करून कचरा नियोजनातील उल्लेखनीय कार्याबद्दल पुणे महापालिकेच्या सर्वसमावेशक स्वच्छ मॉडेलला आंतरराष्ट्रीय स्तरावर (Pune News) गौरविण्यात आले आहे. फिलिपिन्समधील मनिला या शहरात झालेल्या ‘ग्लोबल अलायन्स फॉर इन्सिनरेटर अल्टरनेटिव्हज’तर्फे (गाया) आयोजित विशेष कार्यक्रमात पुण्याचा सन्मान करून उपक्रमाच्या संस्थापक सदस्यपदी नियुक्तीही करण्यात आली.
बदलत्या जीवनशैलीमुळे वाढत्या कचऱ्याचे नियोजन, विल्हेवाट आणि यातून निर्माण होणाऱ्या पर्यावरणीय समस्यांचे आव्हान जगातील सर्वच देशांना भेडसावत आहे. ही समस्या सोडविण्यासाठी पुणे महापालिका आणि कचरा वेचकांच्या ‘स्वच्छ’ संस्थेने गेल्या पंधरा वर्षांत एकत्रितपणे शून्य कचऱ्याच्या दिशेने केलेल्या केलेल्या वाटचालीची दखल या परिषदेत घेण्यात आली.
‘कष्टकरी पंचायती’च्या लुब्ना अनंतकृष्णन आणि पुणे महापालिकेच्या डॉ. केतकी घाटगे यांनी विविध देशांतील प्रतिनिधींना पुण्याच्या घनकचरा व्यवस्थापनाविषयी माहिती दिली. (Pune News) तापमान वाढीस कारणीभूत ठरणाऱ्या मिथेन आणि कार्बन डायऑक्साइड आदी घातक वायू उत्सर्जित करणाऱ्या ओल्या कचऱ्यातून खतनिर्मितीच्या आणि बायोगॅसनिर्मिती प्रकल्पामध्ये महापालिकेने घेतलेल्या पुढाकाराबद्दल त्यांनी परिषदेत माहिती दिली.
फिलिपिन्स येथे आयोजित झीरो वेस्ट सिटीज कॉन्फरन्समध्ये डॉ. केतकी घाटगे, सहा.आरोग्य अधिकारी, मनपा, लुब्ना अनंतकृष्णन, स्वच्छ संस्था यांनी पुण्यातील कचरावेचकांना सामावून घेत केलेले घनकचरा व्यवस्थापन, कचरा वेचकांच्या नेतृत्वाखाली होत असलेल्या झिरो वेस्ट चळवळीविषयी सादरीकरण केले.#PMC pic.twitter.com/VpZIdNA9nb
— PMC Care (@PMCPune) January 27, 2023
Pune News : अमर मुलचंदानी यांच्या घरातून ईडीने जप्त केली तब्बल 3 कोटीहून अधिक संपत्ती
मल्टिलेयर प्लास्टिक, सॅनिटरी कचरा, थर्माकोल यांसारख्या रिसायकलिंगसाठी कठीण असलेल्या कचऱ्याच्या व्यवस्थापनासाठी महापालिकेतर्फे कचरा वेचकांच्या सहभागातून राबविण्यात येणाऱ्या आगामी उपक्रमांची माहितीही त्यांनी दिली.
या परिषदेमध्ये पुण्याने जगभरातील चाळीस शहरांसह मिथेन उत्सर्जन कमी करण्याची शपथ घेतली. या व्यासपीठावर भविष्यातील कचरा वर्गीकरण, ओल्या कचऱ्याची निर्मितीच्या जागीच हाताळणी, प्लास्टिक कचऱ्याच्या व्यवस्थापनावर आधारित आशिया खंडातील विविध शहरांनी उभारलेली ‘शून्य कचरा मॉडेल’ जगासमोर मांडण्यात येणार आहेत.
असंघटित कचरा वेचकांची ताकद मोठी आहे. या गटाने नवीन उपाय शोधण्याबरोबरच खंबीरपणे समस्या सोडविण्यात नेहमी पुढाकार घेतला आहे. (Pune News) त्यामुळे कचरावेचकांच्या सक्षमीकरणावर भर दिला पाहिजे.- डॉ. केतकी घाटगे, सहायक आरोग्य अधिकारी, घनकचरा व्यवस्थापन विभाग
