Pune: जिल्ह्यात कोरोनाबाधित मृतांची संख्या 20 तर रुग्ण संख्या 204 – महापौर

एमपीसी न्यूज – पुणे जिल्ह्यातील कोरोनाबाधित मृतांची संख्या 20 वर गेली असून मृतांपैकी एकजण बारामतीचा तर उरलेले पुणे महापालिका हद्दीतील आहेत. जिल्ह्यातील कोरोनाबाधित रुग्णांची एकूण संख्येने दोनशेचा टप्पा ओलांडला आहे, अशी माहिती पुण्याचे महापौर मुरलीधर मोहोळ यांनी दिली. पुणे शहरात 168, पिंपरी-चिंचवड 22, ग्रामीण 14 अशी कोरोनाबाधित रुग्णांची एकूण संख्या 204 वर जाऊन पोहचली आहे. असे त्यांनी सांगितले.

पुणे जिल्ह्यात कोरोनाने हाहाकार माजवला आहे. बुधवारी एकाच दिवसात कोरोनाचे तब्बल 10 बळी गेले. पुणेकरांनी अधिक काळजी घेण्याची गरज निर्माण झाली आहे. कोणत्याही परिस्थितीत घराबाहेर पडू नये, असे आवाहन प्रशासनाने केले आहे. मास्क वापरणे जिल्हाधिकाऱ्यांनी बंधनकारक केले आहे. पुणे शहरात कोरोनाचे पहिले दोन रुग्ण सापडले, त्याला चार आठवडे पूर्ण झाले. त्यानंतर साथ आटोक्यात येण्याऐवजी दिवसेंदिवस वाढतच आहे. त्यामुळे शहरवासीयांमध्ये चिंतेचे वातावरण निर्माण झाले आहे.

खबरदारीचा उपाय म्हणून पुणे शहरात मध्यवस्तीतील प्रमुख पेठांसह काही भागात तर पिंपरी-चिंचवडमधील चार भाग सील करून संचारबंदी जाहीर करण्यात आली आहे. मात्र संचारबंदी आदेशाचे नागरिक योग्य पद्धतीने पालन करताना दिसत नाहीत. स्वतःला, आपल्या कुटुंबाला व समाजाला कोरोनापासून दूर ठेवण्यासाठी नागरिकांनी दिलेल्या सूचनांचे काटेकोर पालन करून सहकार्य करावे, असे आवाहन महापालिका आयुक्त शेखर गायकवाड यांनी केले आहे.