Pune auto drivers: पुण्यात रिक्षाचालकांची मनमानी! मीटरप्रमाणे भाडे घेण्यास नकार!

एमपीसी न्यूज: रिक्षा भाडेवाढीचा प्रस्ताव प्रादेशिक परिवहन प्राधिकरणाकडे (RTA) प्रलंबित असताना, इंधन दरवाढीमुळे परवडत नसल्याची सबब पुढे करीत पुण्यातील अनेक रिक्षाचालक (Pune auto drivers) मीटरप्रमाणे भाडे आकारण्यास नकार देत आहेत. रिक्षाचालकांकडून होत असलेल्या मनमानी भाडेआकारणीमुळे प्रवासी वर्गाकडून तीव्र संताप व्यक्त करण्यात येत आहे. 

ऑटोरिक्षा भाडेसुधारणा करण्याचा निर्णय 25 जुलै रोजी झालेल्या प्रादेशिक परिवहन प्राधिकरण, पुणेच्या बैठकीत घेण्यात आला होता. पहिल्या दीड किमी अंतरासाठी किमान देय असलेल्या सद्याच्या 21 रूपये भाडेदरात सुधारणा करून सुधारित भाडेदर 23 रूपये व त्यापुढील प्रत्येक किमीसाठी देय भाडे 14 रूपयावरून 15 रूपये करण्याचा निर्णय घेण्यात आला होता.(Pune auto drivers) मात्र भाडेदरवाढीचा पुर्नविचार व्हावा, यासाठी विविध रिक्षा संघटना व प्रवासी संघटनांनी मागणी केली आहे. या अनुषंगाने कार्यवाही सुरू आहे. त्यामुळे 1 ऑगस्टपासून लागू करण्यात येणारी ऑटो रिक्षा भाडे दरवाढ प्रादेशिक परिवहन प्राधिकरणाच्या पुढील बैठकीपर्यंत प्रलंबित ठेवण्यात आली आहे.

दरम्यान, अनेक रिक्षाचालकांनी मात्र प्रवाशांकडून मीटरऐवजी मनमानी भाडेआकारणी सुरू केल्याचे पाहायला मिळत आहे. मीटरप्रमाणे भाडे आकारण्याबाबत प्रवाशांनी आग्रह धरला तर अनेक रिक्षाचालक थेट नकार देत आहेत. हाच अनुभव वारंवार येत असल्याने प्रवाशांकडून संताप व्यक्त करण्यात येत आहे.