Pune : अंदाजपत्रकातील 7 हजार 390 कोटी रुपयांचा टप्पा पार करणे अवघडही नाही; भाजप नगरसेवकांचे विरोधकांना उत्तर

गोपाळ चिंतल म्हणाले, भाजप आणि शिवसेनेची नैसर्गिक युती आहे. पुन्हा एकत्र यावे लागेल. 7 हजार 390 कोटींचे बजेट पार करणे सोपे नाही, पण अवघडही नाही. यामध्ये पंतप्रधान आवास योजना अतिशय महत्वपूर्ण आहे. त्यातून गोरगरिबांना तातडीने घरे मिळावी. एचसीएमटीआर संदर्भात स्वयंसेवी संस्थांच्या काही समस्या आहेत. आयुक्तांनी त्या समजून घ्याव्यात. मुख्य सभेची मान्यता घेतल्या शिवाय कोणतेही कामे आयुक्तांनी करू नये. आम्ही मंजूर केलेली कामे करण्यात यावी.

राजेश येनपुरे म्हणाले, हेमंत रासने यांनी महसूल वाढीसाठी कक्ष स्थापन केला. 10 रुपयांमध्ये बस प्रवास, ही महत्वाची घोषणा आहे. कसबा मतदारसंघ हा माझा जिव्हाळ्याचा विषय आहे. 28 वर्षानंतर मी या सभागृहात आलोय. या काळात पक्षाचे काम करीत होतो.

आरती कोंढरे म्हणाल्या, भाजप आणि अंदाजपत्रकावर केवळ टीका करण्याचे काम विरोधकांकडून सुरू आहे. आम्ही प्रत्युत्तर देत नाही. आमच्या पक्षाचे संस्कार आहेत. आम्हाला वरिष्ठ सभासदांकडून शिकायचे आहे. यापुढे बहुमताचा अवमान सहन करणार नाही, असा इशाराही त्यांनी दिला.

स्थायी समिती अध्यक्षांनी शहराच्या विकासासाठी विचार केला आहे. नगरसेविका मनीषा लडकत, प्रिया गदादे, उज्वला जंगले यांनीही आपले विचार मांडले.