Pune : मराठा प्रवर्गातील युवक-युवतींना व्यवसायाची संधी – नरेंद्र पाटील
अण्णासाहेब पाटील वैयक्तिक कर्ज व्याज परतावा योजनेत पुणे जिल्ह्यातील 1 हजार 418 लाभार्थ्यांना विविध बँकेमार्फत 80 कोटी 60 लाख 68 हजार 212 रुपये कर्ज वाटप करण्यात आले आहे. : Business Opportunity for Maratha Youth - Narendra Patil
एमपीसी न्यूज – अण्णासाहेब पाटील आर्थिक विकास महामंडळाच्या योजनेचा लाभ घेऊन मराठा समाजातील तरुण-तरुणींनी व्यवसाय सुरू करावेत. या माध्यमातून व्यवसायाची अनोखी संधी निर्माण झाली असल्याचे महामंडळाचे अध्यक्ष नरेंद्र अण्णासाहेब पाटील यांनी सांगितले.
नरेंद्र पाटील म्हणाले, मराठा समाजातील युवक युवतींनी नोकरीपेक्षा स्वतःचा उद्योग, व्यवसाय उभारणीला प्राधान्य देण्यासाठी महामंडळाच्या योजनेचा लाभ घ्यावा. तसेच सिबिल (CIBIL) प्रणाली अंतर्गत येणाऱ्या बँकांनीही या योजने अंतर्गत असणाऱ्या प्रकल्पांना मंजुरी द्यावी, असे आवाहनहे पाटील यांनी केले आहे.
पुणे जिल्ह्यातील मराठा आर्थिक दुर्बल घटकातील तरुण-तरुणी, युवक व उद्योजक बनू इच्छिणाऱ्या आणि तशी क्षमता असणाऱ्या व्यक्तींना सहाय्य पुरवण्याच्या दृष्टीने छत्रपती राजाराम महाराज उद्योजकता व कौशल्य विकास अभियानांतर्गत अण्णासाहेब पाटील आर्थिक मागास विकास महामंडळाच्या वतीने व्यावसायिक कर्जावरील व्याज परतावा योजना व कर्ज पुरवठा योजना राबविण्यात येतात.
अण्णासाहेब पाटील वैयक्तिक कर्ज व्याज परतावा योजनेत पुणे जिल्ह्यातील 1 हजार 418 लाभार्थ्यांना विविध बँकेमार्फत 80 कोटी 60 लाख 68 हजार 212 रुपये कर्ज वाटप करण्यात आले आहे.
तर अण्णासाहेब पाटील आर्थिक विकास महामंडळामार्फत पुणे जिल्ह्यातील 841 लाभार्थ्यांना 2 कोटी 53 लाख 71 हजार 585 रुपये व्याज परतावा देण्यात आला आहे, अशी माहिती जिल्हा समन्वयक संकेत लोहार यांनी दिली आहे.
अण्णासाहेब पाटील आर्थिक मागास विकास महामंडळाच्या लाभार्थ्यांनी योजनेचा लाभ घेऊन दुग्ध व्यवसाय, प्रवासी वाहने, किराणा दुकान, शेळीपालन, झेरॉक्स सेंटर, सायकल दुरुस्ती, चर्मोद्योग , फोटोग्राफी, गारमेंट्स, रिक्षा, घरगुती मसाले इत्यादी व्यवसाय यशस्वीरित्या सुरु केले आहेत.
महामंडळाचे काम जिल्हा कौशल्य विकास रोजगार व उद्योजकता मार्गदर्शन केंद्र, पुणे कार्यालयामार्फत केले जाते. मराठा प्रवर्गातील लाभार्थ्यांनी महामंडळाच्या संधीचा लाभ घेऊन व्यवसायाला सुरुवात करावी, असे आवाहन पुणे जिल्हा कौशल्य विकास रोजगार व उद्योजकता मार्गदर्शन केंद्राच्या सहाय्यक आयुक्त अनुपमा पवार यांनी केले आहे.
