Pune Corona Update : 1614 रुग्ण कोरोनामुक्त, 1364 नवे रुग्ण, 46 जणांचा मृत्यू

एमपीसी न्यूज – पुणे शहरात मंगळवारी (दि. 22 सप्टेंबर) तब्बल 1614 रुग्ण कोरोनामुक्त झाले. आतापर्यंत 1 लाख 13 हजार 786 नागरिकांनी वेळीच उपचार घेऊन कोरोनावर यशस्वीरीत्या मात केली आहे. आज 5 हजार 215 कोरोनाच्या चाचण्या करण्यात आल्या. त्यामध्ये 1364 नवे रुग्ण आढळले. 46 जणांचा मृत्यू झाला.

शहरात सध्या 957 क्रिटिकल रुग्ण असून, त्यात 492 जण व्हेंटिलेटरवर आहेत. कोरोनाचे पुणे शहरात 1 लाख 34 हजार 29 रुग्ण झाले आहेत. आतापर्यंत या रोगामुळे 3 हजार 167 नागरिकांचा मृत्यू झाला आहे. 17 हजार 76 अँक्टिव्ह रुग्ण आहेत, अशी माहिती पुणे महापालिकेच्या आरोग्य विभागातर्फे देण्यात आली.

पुणे शहरात कोरोनाच्या चाचण्या आणखी वाढ करण्याची मागणी महापालिका आयुक्तांकडे करण्यात आली आहे. दरम्यान, पुणे शहरातील कोरोनाचे संकट आणखीनच गंभीर होत चालले आहे. कोरोनाच्या पार्श्वभूमीवर नियमांचे पालन न करणाऱ्या दुकानदारां विरोधात कारवाई करण्यासाठी पुणे महापालिकेतर्फे पथके स्थापन करण्यात आली आहेत.

शहरातील प्रतिबंधित क्षेत्राबाहेरील जीवनावश्यक सेवा, दुकाने, मार्केट सकाळी 9 ते सायंकाळी 7 वाजेपर्यंत लॉकडाऊन काळात टप्पेनिहाय सुरू करण्यात आलेले आहे. दुकाने आणि मार्केटमध्ये येत असलेले नागरिकांनी मास्क वापरणे, सामाजिक अंतर ठेवणे, वेळोवेळी परिसर सॅनिटाईज करणे बंधनकारक करण्यात आले आहे.

वेळोवेळी बजावण्यात आलेल्या आदेशाचे पालन होत नसल्याचे निदर्शनास येत आहे. त्या पार्श्वभूमीवर धडक कारवाई करण्याचे आदेश या पथकांना देण्यात आले आहे. क्षेत्रीय स्तरावर अतिक्रमण निरीक्षक, सहाय्यक अतिक्रमण निरीक्षक आणि आरोग्य निरीक्षक असे एकूण 3 कर्मचाऱ्यांचे पथक तयार करण्यात आले आहेत.

वाढत्या कोरोनाला आटोक्यात आणण्यासाठी पुणे महापालिका आणखी कठोर नियम करण्याच्या तयारीत आहे. उपमुख्यमंत्री अजित पवार यांनी तशा प्रकारचे आदेश दिले आहेत.

तर, पुणे शहरातील कोरोनाचे संकट आटोक्यात आणण्यासाठी केंद्र सरकारने पुढाकार घ्यावा, अशी मागणी खासदार गिरीश बापट यांनी आज लोकसभेत केली आहे. सातत्याने कोरोना रुग्ण वाढत असल्याने पुणेकरांमध्ये भीतीचे वातावरण निर्माण झाले आहे.