Pune Corona Update : 1270 रुग्ण कोरोनामुक्त, 30 जणांचा मृत्यू, 643 नवे रुग्ण

एमपीसी न्यूज – पुणे शहरात मागील काही दिवसांपासून कोरोना रुग्णांपेक्षा या आजारातून बरे होण्याचे प्रमाण वाढते आहे. मंगळवारी (दि. 6 ऑक्टोबर) तब्बल 1270 रुग्ण कोरोनामुक्त झाले. आतापर्यंत 1 लाख 32 हजार 540 नागरिकांनी वेळीच उपचार घेऊन कोरोनावर यशस्वीरीत्या मात केली आहे.

आज 4 हजार 334 कोरोनाच्या चाचण्या करण्यात आल्या. त्यामध्ये 643 नवे रुग्ण आढळले. 30 जणांचा मृत्यू झाला. 925 क्रिटिकल रुग्ण असून, त्यात 428 जण व्हेंटिलेटरवर आहेत.

कोरोनाचे पुणे शहरात 1 लाख 50 हजार 433 रुग्ण झाले आहेत. आतापर्यंत या कोरोनामुळे 3 हजार 709 नागरिकांचा मृत्यू झाला आहे. 14 हजार 184 ऍक्टिव्ह रुग्ण आहेत, अशी माहिती पुणे महापालिकेच्या आरोग्य विभागातर्फे देण्यात आली आहे.

पुणे शहरात वाढत्या कोरोनाच्या पार्श्वभूमीवर दुकाने आणि मार्केटमध्ये येत असलेले नागरिकांनी मास्क वापरणे, सामाजिक अंतर ठेवणे, वेळोवेळी परिसर सॅनिटाईज करणे बंधनकारक करण्यात आले आहे. कोरोना रुग्णांवर उपचारासाठी रेमडेसिव्हिर हे इंजेक्शन अतिशय महत्वपूर्ण आहे.

त्याचा काळाबाजार करणाऱ्या विरोधात कडक कारवाई करण्याची मागणी भाजपचे प्रदेशाध्यक्ष चंद्रकांत पाटील यांनी केली आहे. कोरोनाचे रुग्ण कमी होत असल्याचे महापालिका आयुक्तांचे म्हणणे आहे.