Pune Corona Update : पुणे शहरात नवे 321 रुग्ण, 7 हजार 349 ॲक्टिव्ह रुग्ण !
एमपीसी न्यूज : पुणे शहरात आज दिवसभरात नव्याने केवळ 321 रुग्ण आढळले. तर ॲक्टिव्ह रुग्णांची संख्या 8 हजारांच्या खाली म्हणजे 7 हजार 349 इतकी आल्यामुळे संसर्ग दर घटत असल्याचे समाधानकारक चित्र निर्माण होत आहे.
आज 730 करोनामुक्त रुग्णांना घरी सोडले असून आत्तापर्यंत 1 लाख 47 हजार 642 करोनामुक्त रुग्णांना घरी सोडण्यात आले आहे. एकूण 684 रुग्णांची स्थिती गंभीर असून 364 जण व्हेंटिलेटरवर उपचार घेत आहेत.
दिवसभरात 20 रुग्णांचा मृत्यू झाला त्यापैकी 4 रुग्ण पुण्याबाहेरील होते, अशी माहिती पुणे महापालिकेच्या आरोग्य विभागाकडून देण्यात आली.
दरम्यान, शहर आणि उपनगरातील क्षेत्रीय कार्यालय स्तरावर ‘माझे कुटुंब माझी जबाबदारी’ मोहीमे अंतर्गत घरोघरी जाऊन नागरिकांची तपासणी आरोग्य विभागाच्या पथकांद्वारे केली जात आहे. तरीही नागरीकांनी मास्क, हँड सॅनिटायजर आणि सोशल डिस्टंन्सिग नियमांचे पालन करावे.
तसेच सौम्य ते तीव्र लक्षणे आढळल्यास तातडीने अँटीजेन, स्वॅब टेस्टींग करून खबरदारी घ्यावी. तसेच नजिकच्या डॉक्टरकडून औषधोपचार सुरू करण्याचे आवाहन महापालिका प्रशासनाकडून केले जात आहे.
