Pune Crime News : पती-पत्नीच्या भांडणात पत्नीवर कोयत्याने वार
एमपीसी न्यूज – सिंहगड पोलीस स्टेशनच्या हद्दीत पती-पत्नीच्या भांडणात पत्नीवर कोयत्याने वार करण्यात ( Pune Crime News) आले. या घटनेत पत्नी गंभीर जखमी झाली आहे. धायरीतील साई अविष्कार सोसायटीत रविवारी ही घटना घडली. सिंहगड पोलीस ठाण्यात या प्रकरणी गुन्हा दाखल करण्यात आला असून पतीला अटक करण्यात आली आहे.
करुणा आनंद वाघमारे (वय 31) असे गंभीर जखमी झालेल्या पत्नीचे नाव आहे. तर पती आनंद मसाजी वाघमारे (वय 37) याला पोलिसांनी अटक केली आहे.
याप्रकरणी अधिक माहिती अशी की, आरोपी व फिर्यादी हे पती-पत्नी आहेत. त्यांनी एका सराफाच्या दुकानात 25 हजार रुपयांच्या दागिन्यासाठी बुकिंग केले होती. या पैशाबाबत फिर्यादीने पतीला विचारताच त्यांनी खर्च केले असे सांगितले. चिडलेल्या करुणा वाघमारे या माहेरी निघून जात असताना , आरोपीने त्यांना शिवीगाळ करत हात पिरगाळला. यावर फिर्यादीने चावा घेतला असता आरोपीने बेड खाली ठेवला कोयता काढून आज तुला संपवतोच असे म्हणून ठार मारण्याच्या उद्देशाने वार केले. यामध्ये फिर्यादी गंभीर जखमी झाल्या असून त्यांच्यावर उपचार सुरू आहेत.
