Pune : स्थायी समिती अध्यक्षपदासाठी हेमंत रासने उद्या भरणार अर्ज; काँगेस-राष्ट्रवादीच्या उमेदवाराबाबत उत्सुकता
एमपीसी न्यूज – पुणे महापालिकेच्या स्थायी समिती अध्यक्षपदासाठी भाजपतर्फे हेमंत रासने सोमवारी (दि. 2 मार्च) अर्ज दाखल करणार आहेत. तर काँग्रेस-राष्ट्रवादी उमेदवाराबाबत उत्सुकता लागली आहे. या निवडणुकीसाठी शिवसेनासोबत आल्यास महाविकास आघाडी होणार असल्याची महापालिकेत चर्चा सुरू आहे.
या पदासाठी निवडणूक येत्या 6 मार्चला होणार आहे. त्यासाठी अर्ज भरण्याची शेवटची तारीख 2 मार्च आहे. ‘पीएमपीएल’च्या नयना गुंडे निवडणुक निर्णय अधिकारी म्हणून काम पाहणार आहेत.
स्थायी समितीत एकूण 16 सदस्य आहेत. त्यामध्ये भाजपचे 10, राष्ट्रवादी 4 तर, शिवसेना आणि काँगेसचा प्रत्येकी एक सदस्य आहे. त्यामुळे भाजपचा अध्यक्ष निश्चित मानला जात आहे.
अध्यक्षपदासाठी पुन्हा हेमंत रासने यांनाच संधी मिळाली आहे. ते आपल्या समर्थकांसह जोरदार शक्तिप्रदर्शन करणार आहेत.