Pune : लॉकडाऊनची अंमलबजावणी आणखी कठोर होणार; रुग्णदर आणि मृत्यूदर कमी करण्यासाठी प्रशासनाचे नियोजन

एमपीसी न्यूज – पुण्यातील कोरोनाचा वाढता रुग्णदर कमी करण्यासाठी तसेच रुग्णांवर वेळेत आणि योग्य प्रकारे उपचार होऊन मृत्यूदर कमी करण्यासाठी नियोजन करण्याच्या दृष्टीने जिल्हाधिकारी नवल किशोर राम यांच्या अध्यक्षतेखाली आज, रविवारी (दि. 19) महसूल व आरोग्य विभागाची नियोजन बैठक घेण्यात आली. आठ दिवस लॉकडाऊनची अंमलबजावणी आणखी कठोर करण्याच्या सूचना यावेळी जिल्हाधिका-यांनी दिल्या.

बैठकीला जिल्हा परिषदेचे मुख्य कार्यकारी अधिकारी आयुष प्रसाद, अपर जिल्हाधिकारी साहेबराव गायकवाड, निवासी उपजिल्हाधिकारी डॉ. जयश्री कटारे, आरोग्य उपसंचालक डॉ. संजय देशमुख, जिल्हा शल्यचिकित्सक डॉ. अशोक नांदापूरकर, ससून हॉस्पिटलचे समन्वयक राजेंद्र गोळे तसेच महसूल विभाग, पुणे व पिंपरी चिंचवड महानगरपालिका व आरोग्य विभागाचे अधिकारी उपस्थित होते.

बैठकीत जिल्ह्यातील कोरोना रुग्णांना देण्यात येणाऱ्या वैद्यकीय सेवा-सुविधांबाबत जिल्हाधिकारी राम यांनी आढावा घेतला. तसेच या रुग्णांवर उपचार करणाऱ्या डॉक्टर, परिचारिका यांच्यासाठी आवश्यक असणारे पीपीई किट, एन 95 मास्क, सर्जिकल मास्क, हॅन्ड ग्लोव्हज, औषध साठा, बरे झालेल्या रुग्णांना घरापर्यंत पोहोचवण्यासाठी उपलब्ध शासकीय व खाजगी रुग्णालयांच्या रुग्णवाहिकांची उपलब्धता व आवश्यकता, मृतदेहाबाबत घ्यावयाची दक्षता आदी विषयांबाबत तसेच लॉकडाऊन काळात जिल्ह्यात अडकलेल्या प्रवासी व कामगारांसाठीचे निवारा कॅम्प व भोजन व्यवस्था, रेशन धान्य वितरण यांचा आढावा घेतला.

जिल्हाधिकारी राम म्हणाले, “कोणत्याही परिस्थितीत पुण्यातील कोविड-19 रुग्णदर व मृत्युदर कमी व्हायला हवा. आठ दिवस पुणे आणि पिंपरी चिंचवड शहरात तसेच रुग्ण आढळलेल्या ग्रामीण भागात टाळेबंदीची कडक अंमलबजावणी करण्यात येत आहे. यात नागरिकांचे सहकार्य हवे आहे. या काळात नागरिकांनी घरी राहणे आवश्यक असून अत्यावश्यक वस्तूंच्या खरेदीसाठी बाहेर पडणाऱ्या नागरिकांनी सोशल डिस्टनसिंगचे पालन करणे अत्यंत गरजेचे आहे. अत्यावश्यक सेवेत कार्यरत व्यक्तींना पासेस द्यावेत, तसेच या कामातील वाहनांना इंधन पुरवठा होत असल्याची खात्री करावी. त्याचबरोबर शैक्षणिक संस्था मधील प्राचार्यांना पासेस देण्याची व्यवस्था करावी.”

स्वॅब चाचणी निगेटिव्ह असणाऱ्या व्यक्तींना घरी पोहोचण्यासाठी पीएमपीएमएलच्या बसेस वापरता येतील, असे सांगून बस चालकांना मास्क देण्याबरोबरच वेळोवेळी बसचे निर्जंतुकीकरण करुन घ्यावे, अशा सूचना जिल्हाधिकारी राम यांनी दिल्या.

ससून हॉस्पिटल, नायडू हॉस्पिटल, यशवंतराव चव्हाण हॉस्पिटलला आवश्यक असणाऱ्या वैद्यकीय सुविधा तसेच नवले, भारती, सिंबायोसिस आदी खाजगी हॉस्पिटलमध्ये उपलब्ध असलेले पीपीई किट व स्वच्छता विषयक सामग्रीचा जिल्हाधिकारी राम यांनी यावेळी आढावा घेतला.