Pune : मुंबईचे राजे दिलेर दिल्लीकडून पराभूत

एमपीसी न्यूज – सुरुवातीला दोन्ही संघांनी सावध खेळ केला. पहिल्या सत्रात दिलेर दिल्ली संघाने सुरुवातीच्या तीन मिनिटाला मुंबईचे राजे संघावर 5-3 अशी आघाडी घेतली. यानंतर दिल्ली संघाकडून सुनील जयपाल याने जोरदार खेळ करत चढाईत चार गुणांची कमाई करून दिली. त्याच्या या खेळामुळे मुंबईला त्यांनी सर्वबाद करत 12-4 अशी आघाडी घेतली. आपला हाच फॉर्म दिल्लीने कायम ठेवत पहिल्या क्वॉर्टर अखेरीस 13-6 अशी आघाडी घेतली.

पण, मुंबईचे राजे संघाला दुसऱ्या क्वॉर्टरमध्ये देखील फारसे काही करता आले नाही. दिल्लीच्या संघाने दुसऱ्या क्वॉर्टरच्या सुरुवातीच्या तीन मिनिटाला 21-6 अशी आघाडी घेतली. यानंतर मुंबई चे राजे संघाला या क्वॉर्टरमध्ये अवघे सहा गुण मिळवता आले. त्यामुळे दुसऱ्या क्वॉर्टरअखेरीस दिल्लीच्या संघाने 28-12 अशी आघाडी घेतली.

• मुंबईचे राजे संघाने तीन चढाईत सहा गुणांची कमाई करत आघाडी 18-30 अशी कमी केली. मुंबई चे राजे संघाने आपला हा आक्रमक खेळ सुरुच ठेवला पण, दिलेर दिल्ली संघाने काही गुणांची कमाई केली. त्यामुळे तिसऱ्या क्वार्टरअखेरीस दिल्लीच्या संघाने 33-22 अशी आघाडी घेतली.

शेवटच्या क्वॉर्टरअखेरीस दिल्लीच्या संघाने जोर लावत मुंबईला तिसऱ्यांदा सर्वबाद करत 45-25 अशी आघाडी घेतली.मुंबई चे राजे संघाने सलग पाच गुणांची कमाई करत दिल्लीला पहिल्यादा सर्वबाद केले. असे असले तरीही मुंबई संघाला आघाडी घेण्यात यश मिळाले नाही व अखेर सामना 45-36 असा नऊ गुणांनी गमवावा लागला.