Pune: शहरात कोरोनाचे सात नवे रुग्ण, पुणे जिल्ह्यात 254 रुग्ण तर मृतांचा आकडा 29 वर!
एमपीसी न्यूज – पुणे शहरात आज (शनिवारी) सात नवे रुग्ण सापडले असून तीन कोरोनाबाधितांचा मृत्यू झाला आहे. त्यामुळे पुणे जिल्ह्यातील एकूण कोरोनाबाधितांची संख्या 254 झाली असून कोरोना बळींचा आकडा 29 पर्यंत वाढला आहे.
नवीन सात रुग्णांची भर पडल्याने पुणे शहरातील कोरोनाबाधितांची संख्या 213 झाली आहे. पिंपरी-चिंचवडचे 29 व ग्रामीणचे 12 रुग्ण असे मिळून पुणे जिल्ह्यातील कोरोनाबाधितांची एकूण संख्या 254 झाली आहे, अशी माहिती महापौर मुरलीधर मोहोळ यांनी दिली. आज नवीन सापडलेल्या सातही रुग्णांवर ससून सर्वोपचार रुग्णालयात उपचार सुरू आहेत, असेही त्यांनी सांगितले.
पुणे शहरात एकूण 26 जण कोरोनामुक्त
पुणे शहरात कोरोनामुक्त झालेल्यांची संख्या आता 26 झाली आहे. त्यापैकी 23 रुग्णांवर महापालिकेच्या डॉ. नायडू रुग्णालयात उपचार करण्यात आले होते. नगर रस्त्यावरील सह्याद्री रुग्णालय, भारती रुग्णालय व केईएम रुग्णालयातील प्रत्येकी एक रुग्ण कोरोनामुक्त झाला आहे. या सर्व कोरोनामुक्त रुग्णांना होम क्वारंटाईनमध्ये ठेवण्यात आले आहे, अशी माहिती महापौर मोहोळ यांनी दिली.