Pune News : आगामी निवडणूक दोन प्रभाग पद्धतीने होणार असल्याने भाजपचे नुकसान

एमपीसी न्यूज – 2017 मध्ये मोदी लाट कायम होती. त्यामध्ये मनसेच्या नगरसेवकांचा मोठा पाडाव झाला. यावेळी मात्र काँग्रेस, राष्ट्रवादी आणि शिवसेना एकत्रितपणे लढणार आहेत. त्यामुळे यावेळी भाजपच्या नगरसेवकांना टार्गेट करण्यात आले आहेत.

2022 पुणे महापालिका निवडणूक अगदी तोंडावर आहे. त्या पार्श्वभूमीवर पुणे शहर काँग्रेस अध्यक्ष निवड महत्वपूर्ण मानली जात आहे. आगामी निवडणूक दोन प्रभाग पद्धतीने होणार आहे. विशेष म्हणजे ही निवडणूक काँग्रेस – राष्ट्रवादी आणि शिवसेना महाविकास आघाडी सरकार म्हणून लढणार असल्याचे उपमुख्यमंत्री अजित पवार यांनी स्पष्ट केले आहे.

आणखी 23 गावांचा समावेश झाल्यावर मुंबईपेक्षा पुणे मोठी महापालिका होणार आहे. तशा समस्याही वाढणार आहेत.

पुणे आणि पिंपरी – चिंचवड महापालिकेत सत्ता काबीज करण्यासाठी राष्ट्रवादी जोरात कामाला लागली आहे. राष्ट्रवादीच्या मातब्बर नगरसेवकांशी उपमुख्यमंत्री आणि पालकमंत्री अजित पवार यांची वारंवार चर्चा सुरू आहे.

कोणत्याही परिस्थितीत सत्ता स्थापन करण्यासाठी पवार यांनी डावपेच आखायला सुरुवात केली आहे. मोठ्या प्रमाणात विकासकामे करूनही 2017 मध्ये सत्ता न मिळाल्याची राष्ट्रवादीला सल आहे. 2019 च्या विधानसभा निवडणुकीत वडगावशेरी आणि हडपसर मतदारसंघात राष्ट्रवादीचे आमदार निवडून आले. खडकवासला मतदारसंघात केवळ 2200 मतांनी राष्ट्रवादीच्या उमेदवाराचा पराभव झाला. पुणे कॅन्टोन्मेंट आणि शिवाजीनगर मतदारसंघात काँग्रेसच्या उमेदवारांचा केवळ 5 – 5 हजार मतांनी पराभव झाला होता. त्यामुळे आगामी 2022 च्या महापालिका निवडणुकीत राष्ट्रवादी – काँग्रेस आणि शिवसेना महाविकास आघाडी म्हणून निवडणूक लढविणार असल्याचे अजित पवार यांनी स्पष्ट केले आहे.

निवडणुकीच्या रणनीतीचाच 1 भाग म्हणून पुणे महापालिकेत आणखी 23 गावांचा समावेश करण्यासाठी अजित पवार यांनी जोरदार प्रयत्न सुरू केले आहेत. या गावांत राष्ट्रवादीची मोठी ताकद आहे. 2017 ची महापालिका निवडणूक 4 चा प्रभाग म्हणून झाली होती. त्यासाठी भाजपने जोरदार प्रयत्न केले. कोणत्याही परिस्थितीत वॉर्ड किंवा 2 चाच प्रभाग करण्यासाठी राष्ट्रवादीची तयारी आहे. भजपच्या ताब्यातून दोन्ही महापालिका ताब्यात घेण्यासाठी हालचाली सुरू आहेत.

यापूर्वी 11 गावांचा समावेश करण्यात आला आहे. आणखी 23 गावे समाविष्ट केल्यावर वेगळी महापालिका स्थापन होणार नसल्याचे संकेत अजित पवार यांनी दिले आहेत. बावधन, किरकटवाडी, कोंढवे – धावडे, म्हाळुंगे, सुस, कोपरे, नांदेड, नर्हे, शेवाळवाडी, खडकवासला, नांदोशी, मांगडेवाडी, भिलारवाडी, मंतरवाडी, कोळेवाडी, हांडेवाडी, होळकरवाडी, पिसोळी, वडाचीवाडी, जांभूळवाडी, कोळेवाडी, गुजर – निंबाळकरवाडी या महापालिका हद्दीलगतच्या गावांचा समावेश होणार असल्याचे सांगण्यात येत आहे.