Pune News: सुरळीत वीजपुरवठा, नवीन वीजजोडणीसाठी प्राधान्याने उपाययोजना करा

एमपीसी न्यूज – अनलॉकमुळे जनजीवन पूर्वपदावर येत आहे. त्यामुळे प्रामुख्याने लघु व मोठ्या उद्योगांसह सर्व ग्राहकांचा वीजपुरवठा सुरळीत राहील, यासाठी आवश्यक उपाययोजना कराव्यात. नवीन वीजजोडणी देण्याची प्रक्रिया आणखी वेगवान करावी, असे निर्देश ऊर्जा विभागाचे प्रधान सचिव, महावितरणचे अध्यक्ष व व्यवस्थापकीय संचालक असीम कुमार गुप्ता यांनी दिले.

पुणे प्रादेशिक विभागातील पुणे, कोल्हापूर, सातारा, सांगली व सोलापूर जिल्ह्यातील औद्योगिक वसाहतींसह सर्व ग्राहकांचा वीजपुरवठा तसेच नवीन वीजजोडणीसंदर्भात गुप्ता यांनी व्हीडीओ काँन्फरसिंगद्वारे शनिवारी (दि. 26) आढावा बैठक घेतली. यावेळी पुणे प्रादेशिक संचालक (प्र.)  अंकुश नाळे, मुख्य अभियंता सचिन तालेवार (पुणे), सुनील पावडे (बारामती), अंकुर कावळे (प्रभारी, कोल्हापूर) यांची प्रमुख उपस्थिती होती.

असीम कुमार गुप्ता म्हणाले, कोरोना विषाणूचा संसर्ग टाळण्याच्या उपाययोजना करीत व सावधगिरी बाळगत सर्वत्र अनलॉकची प्रक्रिया सुरु झाली आहे. त्यामुळे जनजीवनासह लहान-मोठ्या उद्योगांचे चक्र पूर्वपदावर आले आहे. सोबतच विजेची मागणी देखील वाढत आहे. या पार्श्वभूमिवर लघु व मोठ्या उद्योगांचा वीजपुरवठा सुरळीत राहील, यासाठी तत्काळ उपाययोजना कराव्यात. आवश्यकता असल्यास तातडीने कृती आराखडा तयार करून मुख्यालयात पाठविण्यात यावा, असे निर्देशही त्यांनी दिले.

 प्रामुख्याने माहिती तंत्रज्ञानसह इतर क्षेत्रातील अधिकारी व कर्मचाऱ्यांचे वर्क फ्रॉम होम सुरु असल्याने सर्वत्र वीजपुरवठा सुरळीत राहील, याची प्राधान्याने काळजी घ्यावी, त्यासाठी पर्यायी व्यवस्था उपलब्ध करून ठेवावी. यासोबतच लघु व मोठ्या उद्योगांसह घरगुती व वाणिज्यिक वर्गवारीतील नवीन वीजजोडण्यांचे अर्ज प्राप्त झाल्यानंतरची प्रक्रिया आणखी वेगवान करण्यात यावी, अशा सूचना असीम कुमार गुप्ता यांनी दिल्या. या आढावा बैठकीत पुणे प्रादेशिक विभागातील अधीक्षक अभियंता व इतर वरिष्ठ अधिकारी आदींची उपस्थिती होती.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.