Pune : पुणे पोलिसांनी 5 कोटी 75 लाख रुपयांचा मुद्देमाल नागरिकांना केला हस्तांतरित
एमपीसी न्यूज – पुणे पोलिसांनी विविध गुन्ह्यातील तब्बल 5 कोटी 75 लाख रुपये ( Pune) किमतीचा मुद्देमाल मूळ मालकांना हस्तांतरित केला. पालकमंत्री चंद्रकांत पाटील यांच्या हस्ते हा मुद्देमाल वितरीत करण्यात आला. तसेच पालकमंत्र्यांच्या हस्ते चांगली कामगिरी करणाऱ्या पोलीस अधिकारी, कर्मचाऱ्यांचा सन्मान देखील करण्यात आला.
पुणे शहर पोलीस मुख्यालय मैदान येथे हा कार्यक्रम पार पडला. कार्यक्रमाला पालकमंत्री चंद्रकांत पाटील, पोलीस आयुक्त रितेश कुमार, सह पोलीस आयुक्त संदीप कर्णिक, अपर पोलीस आयुक्त रंजनकुमार शर्मा, रामनाथ पोकळे, प्रविणकुमार पाटील आणि वरिष्ठ पोलीस अधिकारी उपस्थित होते.
पालकमंत्री चंद्रकांत पाटील म्हणाले, पोलीस प्रत्येक गुन्ह्यांचा तपास गांभीर्याने आणि परिश्रमपूर्वक करतात. त्यामुळे नागरिकांनी पोलिसांसोबत असणे, त्यांना सहकार्य करणे आणि प्रोत्साहन देणे गरजेचे आहे. मुद्देमाल परत करण्याचा कार्यक्रम अभिनव असून त्याद्वारे मुद्देमाल मिळालेल्यांना समाधान मिळते आणि जनतेत पोलिसांविषयी चांगला संदेश जातो, विश्वासाची भावना निर्माण होते. त्यासोबत चांगली कामगिरी करणाऱ्या पोलीस अधिकारी-कर्मचाऱ्यांना प्रोत्साहनही मिळते.
PMRDA : पेठ क्रमांक 12 मधील पात्र लाभार्थ्यांना 6 जून पासून मिळणार सदनिकांचा ताबा
एखादा गुन्हा घडू नये म्हणून प्रयत्न करण्यासोबत झालेल्या गुन्ह्यांचा शोध लावून गुन्हेगाराला शिक्षा झाल्यास कायदा-सुव्यवस्थेचे वातावरण निर्माण होते. गुन्ह्याच्या मागे एक प्रकारचे मानसशास्त्र असते. गुन्ह्याचा तपास करताना पोलिसांना खूप परिश्रम करावे लागतात. त्यामुळे चांगली कामगिरी करणारे पोलीस अधिकारी अभिनंदनाला पात्र आहेत.
अलीकडच्या काळात गुन्हेगार अद्ययावत तंत्रज्ञानाचा उपयोग करीत आहेत. त्या तुलनेत पोलीस अत्यंत मर्यादित साधनांसह आपले काम चांगल्याप्रकारे करतात. पोलिसांना अद्ययावत शस्त्र, साधने उपलब्ध करून देण्यासाठी आणि पोलीस वसाहतीच्या दुरुस्तीसाठी जिल्हा नियोजन समिती आणि सामाजिक उत्तरदायित्व निधीच्या माध्यमातून 100 कोटी रुपयांचा निधी देण्यात येणार आहे, अशी माहिती त्यांनी दिली.
प्रास्ताविकात पोलीस आयुक्त रितेश कुमार म्हणाले, गुन्हे उघडकीस आल्यावर मुद्देमाल हस्तगत करणे कठीण असते. पोलीस अधिकारी परिश्रमपूर्वक हे काम करतात आणि कायदेशीर बाबी पूर्ण करून मुद्देमाल फिर्यादींना हस्तांतरित केला जातो. असा सुमारे 5 कोटी 75 लाख रुपयांचा मुद्देमाल कार्यक्रमात हस्तांतरित करण्यात येत आहे, अशी माहिती त्यांनी दिली.
पालकमंत्री चंद्रकांत पाटील यांच्या हस्ते 58 नागरिकांना मुद्देमाल हस्तांतरित करण्यात आला आणि चांगली कामगिरी करणाऱ्या पोलीस अधिकारी-कर्मचाऱ्यांचा प्रशस्तीपत्र देऊन सत्कार करण्यात आला. पालकमंत्र्यांनी स्वतः भेटवस्तू देऊन या पोलीस अधिकारी-कर्मचाऱ्यांचे ( Pune) कौतुक केले.
