Pune : काळवीट व हरणाच्या कातड्याची तस्करी करणाऱ्या दोन जणांना अटक
एमपीसी न्यूज- काळवीट व हरणाच्या कातड्याची तस्करी करणाऱ्या दोन जणांना पुणे वनविभागाच्या अधिकारी आणि कर्मचाऱ्यांनी अटक केली त्यांच्याकडून काळवीट व हरणाची तीन कातडी हस्तगत करण्यात आली. ही कारवाई कात्रज घाटामध्ये भिलारेवाडी येथे करण्यात आली.
दीपक सुभाष कुलकर्णी व गणेश लहू पवार अशी या प्रकरणी अटक केलेल्या दोन आरोपींची नावे आहेत. त्यांच्याकडून काळवीट व हरणाची तीन कातडी आणि गुन्ह्यात वापरलेली सॅन्ट्रो कार जप्त करण्यात आली. या प्रकरणी वनपाल खेड शिवापूर एस एस बुचडे व एस.एस. खेडेकर यांनी फिर्याद दाखल केली. आरोपीना न्यायालयात हजार केले असता दोघांना सात दिवसांची पोलीस कोठडी सुनावण्यात आली.
ही कारवाई मुख्य वनसंरक्षक विवेक खांडेकर, उपवनसंरक्षक श्रीमती श्रीलक्ष्मी ए यांच्या मार्गदर्शनाखाली सहायक वनसंरक्षक संजय मारणे यांच्या नेतृत्वाखाली भांबुर्डा वनपरिक्षेत्र अधिकारी मुकेश सणस, दीपक पवार यांच्या पथकाने केली. या कारवाईत मनोज पारखे, अनिल राठोड, रवी मगर या वनसंरक्षकांनी सहभाग घेतला.