Mpc News Vigil : वर्षभरात शहरात 22 ठिकाणी दरोडे

एमपीसी न्यूज – पिंपरी चिंचवड शहरात जानेवारी ते नोव्हेंबर या अकरा महिन्यात 22 ठिकाणी दरोड्याचा घटना  घडल्या आहेत. त्यातील 21 घटना उघडकीस आल्या आहेत. तर एका घटनेचा तपास पोलिसांना लागलेला नाही.

शहरात वाहन चोऱ्या, सोनसाखळी चो-या, मोबाईल हिसकावणे यांसारख्या चोऱ्यांचे प्रमाण वाढत आहे. यातूनच पुढे दरोडे देखील टाकण्यास हे गुन्हेगार मागेपुढे पाहत नाहीत. काही जणांचे टोळके मिळून दरोडा टाकतात. अनेक वेळेला हे गुन्हेगार शस्त्रांचाही वापर करतात. शहरात मागील अकरा महिन्यात 11 ठिकाणी व्यावसायिक दरोडे तर 11 ठिकाणी तांत्रिक दरोड्याच्या घटना घडल्या आहेत.

पाच किंवा पाच पेक्षा अधिक व्यक्ती धाक दाखवून, मारहाण करून अथवा गंभीर जखमी करून जबरदस्तीने चोरी करतात, तेंव्हा दरोड्याचा गुन्हा दाखल करण्यात येतो. याला दरोडा अथवा व्यावसायिक दरोडा म्हटले जाते. तसेच भांडण सुरू असेल आणि भांडणा-या, मारहाण करणाऱ्या व्यक्तींमध्ये पाच अथवा पाच पेक्षा अधिक व्यक्तींचा समावेश असेल त्यांनी जबरदस्तीने चोरी करण्याचा प्रयत्न केल्यास देखील दरोड्याच्या कलमाखाली गुन्हा दाखल करण्यात येतो. याला तांत्रिक दरोडा असेही म्हटले जाते.

दरोड्याच्या तयारीत असताना पोलिसांनी चोरट्यांचा डाव उधळून लावण्याच्या तीन घटना घडल्या असून यातील दोन घटना नोव्हेंबर महिन्यातील आहेत. या तिन्ही घटनेतील आरोपींच्या पोलिसांनी मुसक्या आवळल्या आहेत. चोरीची भूक वाढल्याने तसेच परिसरात दहशत निर्माण करण्यासाठी चोरटे दरोडे घालतात.

लॉकडाऊननंतर जून, जुलै आणि नोव्हेंबर महिन्यात सर्वाधिक दरोड्याच्या घटना घडल्या. या तीन महिन्यात अनुक्रमे 4, 3, 3 घटना घडल्या आहेत. यावर्षी घडलेल्या दरोड्याच्या घटना मागील वर्षीच्या तुलनेत कमी आहेत. मागील वर्षी जानेवारी ते नोव्हेंबर 2019 या कालावधीत 30 ठिकाणी दरोड्याच्या घटना घडल्या. त्या सर्व घटना पोलिसांनी उघडकीस आणून सर्व गुन्ह्यातील आरोपींना अटक केली होती.

अकरा महिन्यातील दरोड्याच्या घटना –

जानेवारी – 1

फेब्रुवारी – 3

मार्च – 2

एप्रिल – 0

मे – 2

जून – 4

जुलै – 3

ऑगस्ट – 1

सप्टेंबर – 1

ऑक्टोबर – 2

नोव्हेंबर – 3