Stamp Registration : दस्त नोंदणीसाठी ऑनलाईन सेवांचा लाभ घेण्याचे आवाहन
एमपीसी न्यूज – राज्यात कोरोना विषाणूचा प्रादुर्भाव मोठ्या प्रमाणावर असल्याने राज्य शासनाच्या निर्देशाप्रमाणे कोरोना विषाणूचा प्रादुर्भाव रोखण्यासाठी विभागाने नागरिकांच्या सुरक्षिततेच्या दृष्टीने व दस्त नोंदणीच्या सोईसाठी विभागात काही ऑनलाईन सेवा उपलब्ध आहेत.
या सेवांचा नागरिकांनी वापर करुन दुय्यम निबंधक कार्यालयातील गर्दी कमी करण्याच्या उद्देशाने खालील सेवा व सुविधांचा वापर करण्याचे अनिवार्य करण्यात आले असून त्याचा वापर करुन दस्त नोंदणी बाबत शासनास सहकार्य करावे, असे आवाहन करण्यात आले आहे.
– नागरिकांनी या विभागाच्या संकेतस्थळावर असलेल्या दस्त नोंदणी करीता PDE द्वारे डाटा एंट्री करणे अनिवार्य करण्यात आले आहे. यापुढे दुय्यम निबंधक कार्यालयातील डेटा एंट्री किंवा दुरुस्त्या पूर्णपणे थांबविण्यात येत आहेत.
– नागरिकांनी PDE डेटा एंट्री करुन दस्त नोंदणीसाठी या विभागाच्या वेबसाईटवर eStep-in या प्रणालीद्वारे दुय्यम निबंधक कार्यालयातील उपलब्ध असलेली सोईची वेळ ऑनलाईन आगाऊ बुक करुन किंवा कार्यालयीन दूरध्वनीवर) समक्ष संपर्क साधून वेळ आरक्षित करणे अनिवार्य करण्यात आले आहे. कोणत्याही परिस्थितीत आगाऊ वेळ आरक्षित केली नसल्यास (walking) दस्त नोंदणी होणार नाही याची कृपया नोंद घ्यावी.
– नागरिकांनी दस्ताचे निष्पादन घरी किंवा कार्यालयाच्या बाहेरच करावे व प्रत्येक व्यक्तीने सह्यांसाठी स्वत:चे पेन आणणे, एकच पेन एकमेकात सह्यांसाठी वापरु नये. आरक्षित वेळेलाच कार्यालयात हजर रहावे, मास्क लावल्याशिवाय कोणत्याही व्यक्तीला कार्यालयात प्रवेश दिला जाणार नाही याची नोंद घ्यावी.
– विभागाच्या वेबसाईटवर लिव्ह ॲण्ड लायसन ई-रजिस्ट्रेशन प्रणालीचा पर्याय उपलब्ध असल्याने लिव्ह ॲण्ड लायसन दस्ताची कार्यालयातील नोंदणी (फिजिकल रजिस्ट्रेशन) पुढील आदेशापर्यंत थांबवण्यात येत आहे.
– सद्यस्थितीत दस्त नोंदणीसाठी मोठ्या शहरात उदा. मुंबई, ठाणे, पुणे व इतर ठिकाणी सकाळ व दुपार दोन सत्रात कार्यालये सुरु आहेत. त्याऐवजी अशा सर्व दुय्यम निबंधक कार्यालयाच्या कामकाजाची वेळ नियमित सत्रात म्हणजेच 9.45 ते 6.15 या वेळेत सुरु राहतील, याशिवाय जी दुय्यम निबंधक कार्यालये दस्त नोंदणीसाठी शनिवार व रविवार सुट्टीच्या दिवशी सुरु होते. त्याचे कामकाज शनिवार व रविवारी बंद करण्यात येत असून त्या कार्यालयांचे कामकाज सोमवार ते शुक्रवार पाच दिवस नियमित सुरु राहील, असे नोंदणी उपमहानिरीक्षक मुंबई विभाग, यांनी प्रसिद्धीपत्रकाद्वारे कळवले आहे.
