Talegaon Crime News : कामगार मृत्यू प्रकरणी गंगा पेपर मिल व्यवस्थापनाच्या विरोधात अखेर गुन्हा दाखल
एमपीसी न्यूज – कंपनीतील सेलो टॅंकमध्ये पडून एका कामगाराचा मृत्यू झाला. या प्रकरणी मयत कामगाराच्या कुटुंबियांनी माहिती अधिकार कार्यकर्ते प्रदीप नाईक यांच्या माध्यमातून पोलीस आयुक्त कृष्ण प्रकाश, विधानसभेचे विरोधी पक्षनेते प्रवीण दरेकर यांच्याकडे पाठपुरावा केला. या पाठपुराव्याला यश आले असून बेबेड ओहोळ येथील गंगा पेपर मिल कंपनी व्यवस्थापनाच्या विरोधात गुन्हा नोंद करण्यात आला आहे.
अनुकूल लाहा असे मयत कामगाराचे नाव आहे. मानसी अनुकूल लाहा वय (41, रा. गंगा पेपर मिल कामगार वसाहत, बेबेडओहोळ, ता. मावळ) यांनी याबाबत तळेगाव दाभाडे पोलीस ठाण्यात फिर्याद दिली आहे. त्यानुसार गंगा पेपर मिल युनिट हेड विद्याशंकर द्विवेदी आणि गंगा पेपर मिल व्यवस्थापन यांच्या विरोधात भारतीय दंड विधान कलम 304 (अ), 506, 34 प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी मानसी लाहा यांचे पती गंगा पेपर मिलमध्ये काम करत होते. 1 सप्टेंबर 2020 रोजी मध्यरात्री दीड वाजण्याच्या सुमारास फिर्यादी यांच्या पतीचा कंपनीतील सेलो टॅंकमध्ये पडून मृत्यू झाला. याबाबत आरोपींनी फिर्यादी यांच्या पतीला सुरक्षा उपकरणे पुरवली नाहीत. तसेच सेलो टॅंक येथे सुरक्षा साहित्य बसवले नाही. त्यामुळे हा प्रकार घडला. फिर्यादी यांच्या पतीने आरोपींना कंपनीत सुरक्षा साहित्य बसविण्याबाबत वारंवार सांगितले होते. मात्र आरोपींनी त्यांच्या सांगण्याकडे दुर्लक्ष केले.
फिर्यादी यांच्या पतीच्या निधनानंतर आरोपींनी फिर्यादींना कंपनीच्या वसाहतीमधून हाकलून देऊन जीवे मारण्याची धमकी दिली. त्यामुळे त्यांनी याबाबत गुन्हा दाखल केला नव्हता. सुमारे नऊ महिन्यानंतर याबाबत गुन्हा दाखल करण्यात आला आहे.
दरम्यान माहिती अधिकार कार्यकर्ते प्रदीप नाईक यांच्या माध्यमातून फिर्यादी आणि त्यांच्या मुलीने पिंपरी चिंचवडचे पोलीस आयुक्त कृष्णप्रकाश, विधानसभेचे विरोधी पक्षनेते प्रवीण दरेकर यांच्याकडे निवेदन, अर्ज केले. दरेकर यांनी या प्रकरणी लक्ष घालण्याचे फिर्यादी यांना आश्वासन दिले होते. त्यानंतर याबाबत गुन्हा दाखल करण्यात आला आहे. पोलीस उपनिरीक्षक गावित पुढील तपास करीत आहेत.
