Virat Kohli : विराट कोहलीचे शतकांचे अर्धशतक; फायनलला जाण्यासाठी न्यूझीलंडपुढे 398 धावांचे विशाल लक्ष्य!
एमपीएससी न्यूज (विवेक दिगंबरराव कुलकर्णी) – महान खेळाडू सचिन तेंडुलकरच्या 49 शतकाच्या विक्रमाला मुंबईच्या वानखेडे मैदानावर त्याच्याच उपस्थितीत मागे टाकणाऱ्या विराट कोहलीच्या (Virat Kohli) 50 व्या विश्व विक्रमी शतकाच्या जोरावर भारतीय संघाने उपांत्य फेरीच्या पहिल्या सामन्यात न्यूझीलंड संघापुढे 398 धावांचे अशक्यप्राय आव्हान उभे केले आहे.
2019 च्या विश्वकप स्पर्धेत भारतीय संघाला पराभूत करणाऱ्या न्यूझीलंड संघाविरुद्धच भारतीय संघाचा 2023 च्या विश्वकप स्पर्धेतला उपांत्य फेरीचा सामना आज मुंबईच्या वानखेडे मैदानावर खेळला जात आहे, ज्यात नाणेफेक जिंकून प्रथम फलंदाजी करणाऱ्या भारतीय संघाने कोहलीच्या (Virat Kohli) विश्वविक्रमी शतकाच्या जोरावर, कर्णधार रोहीतच्या स्फोटक सलामीच्या जोरावर, युवा गीलच्या शुभ खेळीच्या तर श्रेयस अय्यरच्या आणखी एका सातत्यपूर्ण खेळीच्या जोरावर 398 धावांचे विशाल लक्ष्य ठेवत हिशोब चुकता करण्याच्या दृष्टीने पहिले पण दमदार पाऊल टाकले आहे.
नाणेफेकीचा कौल भारतीय संघाच्या बाजूने लागला. दोन्हीही संघांने आपल्या अखेरच्या सामन्यात खेळवलेलाच संघ कायम ठेवला.डावखुरा गोलंदाज ट्रेंट बोल्टच्या पहिल्याच षटकात रोहितने 10 धावा चोपत शानदार सुरवात करून दिली, तर या वर्षभरात जबरदस्त फॉर्मात असलेल्या गीलनेही साऊदीच्या पहिल्या आणि सामन्याच्या दुसऱ्या षटकात दोन खणखणीत चौकार मारत कर्णधार रोहितचाच कित्ता गिरवला.
याच सुरुवातीचा कहर तिसऱ्या षटकात तसाच बहरत वाढत गेला जेंव्हा रोहितने बोल्टच्या दुसऱ्या षटकात मिडऑफच्या डोक्यावरून चेंडू थेट प्रेक्षकांत भिरकावून दिला. यावेळी भारतीय संघाच्या जयघोषणांनी प्रेक्षकांनी मैदान डोक्यावर घेतले. रोहितचा आजचा मूड अतिशय खतरनाक होता, त्याने आणखी एक षटकार मारत या वर्ल्डकपमध्ये सर्वाधिक 26 तर एकूण 50 षटकार मारत आणखी एका विक्रमाला आपल्या नावावर केले.
या धडाक्यात केवळ 5 षटकांतच भारतीय संघ आपल्या अर्धशतकी सलामी पूर्ण करेल असे वाटत होते, पण गीलने पुढील तीन चेंडू शांतपणे खेळून काढत भागीदारी कशी बनते हे दाखवून देत होता. रोहितने केवळ 18 चेंडूत 3 चौकार आणि तीन देखणे षटकार मारत या 47 धावांच्या भागीदारीत 33 धावा चोपून” कॅप्टन लीड फ्रॉम द फ्रंट “चा सोदाहरण दाखला देत होता.
पूर्ण भरात असलेल्या रोहितच्या फलंदाजी इतके देखणे सौंदर्य लताबाईचे गाणे, मधूबालाचे आरस्पानी सौंदर्य यांच्या इतकीच देखणे असते. त्याचा फक्त निखळ आनंद घ्यावा, बस्स!
न्यूझीलंड संघाचे चाहते जगभर आहेत, मी ही त्यांच्या संघाचा, खिलाडूवृत्तीचा फार मोठा चाहता आहे, पण त्याहीपेक्षा मी सगळ्यात मोठा फॅन आहे, रोहितच्या अशाच आक्रमक फलंदाजीचा. याच न्यूझीलंड संघाने विश्व कप स्पर्धा 2019 मध्ये आपल्याला उपांत्य फेरीत गारद करत असंख्य भारतीय चाहत्यांना निराश केले होते, तशीही ही टीम आपल्याला वर्ल्ड कप इतिहासात सतत आडवी जाते, असे म्हटले जाते पण आज रो सुपरहिट शर्माचा आवेश असा काही होता की, त्याच्या स्फोटक फलंदाजीपुढे ही तगडी किवी गोलंदाजी पहिल्या काही षटकात तरी पालापाचोळा झाली.
त्याने आज या विश्व कप स्पर्धेत 50 षटकार मारणारा पहिला फलंदाज हा बहुमान पटकावला. रोहीत आज जबरदस्त फलंदाजी करणार असे वाटत असतानाच 47 धावांवर असताना आणखी एक उत्तुंग षटकार मारण्याच्या नादात तो केन विल्यमसनच्या शानदार झेलामुळे अर्धशतक पूर्ण न करताच साउदीच्या गोलंदाजीवर बाद झाला, पण त्याआधी रोहितने केवळ 29 चेंडूत 4 चौकार आणि तितकेच षटकार मारत घणाघाती 47 धावा केल्या आणि संघाला केवळ 50 चेंडूत 70 धावांची स्फोटक सलामी देवून तो तंबूत परतला.
यावेळी काही क्षण तरी संपूर्ण मैदानात सूनसान शांतता पसरली होती. त्याच्या जागी आला तो या स्पर्धेत सर्वाधिक धावा करणारा विक्रमादित्य विराट कोहली (Virat Kohli). त्याने डावाला पुढे नेताना गीलला सुरुवातीला फक्त साथ देणेच पसंत केले. गीलने सुरवातीला जरी फारशी आक्रमक फलंदाजी केली नसली तरीही त्याने केवळ 41 चेंडूतच आपले या विश्वकप स्पर्धेतले चौथे अर्धशतक पूर्ण करताना 7 अतिशय देखणे,पण तितकेच कलात्मक चौकार आणि एक शानदार षटकार मारत आपले अर्धशतक महत्वाच्या सामन्यात आपले वैयक्तिक 13 वे अर्धशतक पूर्ण करताना तो महत्वाच्या सामन्याचा मोठा खेळाडू आहे हेच सिद्ध केले. त्याने केलेल्या या शानदार फलंदाजीमुळे भारताने 20 व्या षटकातच आपले दीडशतक फलकावर लावले. यात अर्ध्या (74) धावा गीलच्या होत्या.
भारतीय संघासाठी उपांत्यफेरीच्या सामन्यासाठीची ही जणू शुभच बात होती.सगळे काही छान चालू आहे असे वाटत होते मात्र नेमके याचवेळी शुभमन गीलच्या स्नायू आखडल्यामुळे नाईलाजाने तो रीटायर हर्ट होवून 79 धावांवर असताना तंबूत परतला.भारतीय संघासाठी ही जरी काहीशी काळजीची बाब असली तरी भारतीय संघासाठी शुभमनचे पूर्णपणे फीट होणे जास्त महत्वाचे होते, त्यामुळेच रोहितने त्याला तंबूत परत बोलावले.
त्याच्या जागी खेळायला आला तो आणखी एक शानदार फॉर्मात असलेला फलंदाज म्हणजेच श्रेयस अय्यर. दुसऱ्या बाजूला असलेल्या कोहलीच्या (Virat Kohli) एकाग्रतेला मात्र कोणीही भंग करू शकले नाही. आज त्याने आणखी एक विक्रम पार केला. वैयक्तिक 46 धावा पूर्ण करताच त्याने रिकी पोंटिंगच्या 13,722 धावांच्या दुसऱ्या क्रमांकाच्या सर्वाधिक धावांचा विक्रम नेस्तनाबूत करत आपले नाव दुसऱ्या क्रमांकावर आणले.आता त्याच्या पुढे फक्त महान सचिन तेंडुलकरच आहे. याचबरोबर त्याने आणखी एक आणि विश्वकप स्पर्धेतले 6 वे अर्धशतक पूर्ण करुन भारतीय संघाला मोठ्या धावसंख्येची आसही दाखवली. याचबरोबर त्याने एका वर्ल्डकपमध्ये 8 वेळा 50 वा याहून अधिक धावा करुन सचिन तेंडुलकरचाही विक्रम मोडला.
या यादीत दुसऱ्या क्रमांकावर कोण आहे माहीत आहे? बांगलादेशचा शकिब हसन. कोहलीचे इथून पुढे असे अगणित विक्रम होतीलच, पण आज वानखेडेवर असलेल्या असंख्य क्रिकेट रसिकांइतकेच जगभरातून टीव्हीच्या माध्यमातून सामना बघत असलेल्या प्रेक्षकांना आजच्या सामन्यातल्या भारतीय संघाच्या विजयासोबत आणखी एका विक्रमाची प्रचंड आतुरता होती ती म्हणजे कोहलीचे 50 वे विक्रमी शतक. ते व्हावे याची आतुरतेने वाट बघणाऱ्या प्रेक्षकांना त्याने आज 80 वी धाव पूर्ण करताच एका विश्वकप स्पर्धेत 674 धावा करुन तेंडुलकरचा सर्वाधिक 673 धावांच्या विक्रमालाही मागे सोडले.
दुसऱ्या बाजूने खेळत असलेल्या श्रेयस अय्यरने आजही शानदार फॉर्म चालूच ठेवत आपल्या संघातल्या सर्वात अनुभवी खेळाडूला उत्तम साथ दिली. त्याने केवळ 35 चेंडूतच आपले अर्धशतक पूर्ण केले. ही त्याची सलग चौथी अर्धशतकी वा त्याहून जास्त धावांची खेळी. बघता बघता ही भागीदारीही चांगलीच जमली. 40 व्या षटकाखेरीस या जोडीने 123 धावांची बहुमूल्य पण तितकीच वेगवान भागीदारी करून संघाला 287 धावांचा टप्पा गाठून दिला. उरलेल्या 10 षटकात हातात असलेले गडी यामुळे भारतीय संघ 380 पर्यंत मजल मारेल असे वाटत होते. याच्या आधी जगभरातल्या सच्चा क्रिकेट प्रेमींना दिवाळीचा आनंद तेंव्हा साजरा करता आला जेंव्हा विराटने (Virat Kohli) आज महान खेळाडू सचिन तेंडुलकरच्या अनेक वर्षांपासून अबाधित असलेल्या 49 शतकाच्या विक्रमाला मागे टाकत एकदिवसीय सामन्यात 50 शतक करणारा जगातला पहिला फलंदाज बनण्याचा बहुमान पटकावला.
विराटने केवळ 291 सामन्यातच अशी कामगिरी करुन हा विक्रम आणखीनच अजरामर केला.विशेष बाब म्हणजे हा विक्रम मोडत असताना दुसरा विक्रमवीर सचिन तेंडुलकर दस्तुरखुद मैदानात उपस्थित होता. त्याचबरोबर फुटबॉल मधला आणखी एक मोठा खेळाडू डेविड बेकहेम सुद्धा मैदानावर उपस्थित होता. तमाम भारतीयांची मान गर्वाने उंचावत विराटने आपले नाव खऱ्या अर्थाने अजरामर केले.
शतक झाल्या नंतर तो जोरदार फटकेबाजी करत होताच की एक उंच फटका मारण्याच्या नादात तो 117 धावांवर असताना साउदीच्या गोलंदाजीवर झेलबाद झाला. तो बाद होवून तंबूत परतत असताना तमाम प्रेक्षकांनी उभे राहून टाळ्यांचा कडकडाट करत आपल्या या लाडक्या विश्वविक्रमवीराला शानदार मानवंदना दिली.
मुंबईच्या दमट हवामानात शरीरातील क्षार कमी होतात, हे माहीत नसेल असा क्रिकेट रसिक भारतातच काय जगभरातही नसेल, पण त्याच मैदानावर विराटने (Virat Kohli) आजच्या या मोठया सामन्यात केलेली विश्वविक्रमी खेळी प्रत्येक क्रिकेट रसिकांच्या हृदयात चिरकाल राहील.त्याच्या या दृढनिश्चयी खेळीचे महत्व तुमच्या तेंव्हा लक्षात येईल जेंव्हा आपल्या विश्व कप स्पर्धेतल्या पहिल्या शतकाच्या उंबरठ्यावर असलेल्या अन त्याच्या पेक्षा 12 वर्षांने लहान असलेल्या गीलला खेळायला येता आले नाही. विराटने रचलेल्या पायावर कळस करणारी खेळी करत श्रेयस अय्यरने केवळ 67 चेंडूतच आपले सलग दुसरे शतक करत शानदार खेळी केली. उपांत्यफेरी च्या महत्वपूर्ण सामन्यात त्याने अशी खेळी करून भारतीय संघाच्या विजयाचा खऱ्या अर्थाने पाया रचला असे म्हटले तर त्यात काहीही वावगे ठरणार नाही.
श्रेयसच्या या शतकात 3 चौकार आणि 9 षटकार सामील होते.या शानदार फटकेबाजीच्या जोरावर भारतीय संघाने आपल्या निर्धारित 50 षटकात 4 बाद 397 धावांची विशाल धावसंख्या रचून न्यूझीलंड संघापुढे मोठे आव्हान ठेवले आहे,याला किवी संघ कसे उत्तर देतो हे बघणे औत्सुक्याचे असेल.
