Wakad Crime News : हॉटेल बिल भरण्यासाठी दिलेल्या एटीएम कार्डचे क्लोनिंग करुन 54 हजार खात्यातून काढले

एमपीसी न्यूज – हॉटेलमध्ये बिल भरण्यासाठी दिलेल्या एटीएम कार्डचे क्लोनिंग करून त्याआधारे पैसे काढून घेण्याचे प्रकार वाढत आहेत. भोसरी येथे एका हॉटेलमध्ये असा प्रकार घडल्यानंतर एक महिन्याच्या कालावधीत पिंपळे निलख येथे दुसरा प्रकार उघडकीस आला आहे.

पिंपळे निलख येथील वाघजाई हॉटेलमध्ये जेवण करण्यासाठी गेलेल्या दोन ग्राहकांच्या एटीएम कार्डचे क्लोनिंग करून त्याआधारे त्यांची 53 हजार 900 रुपयांची फसवणूक करण्यात आली आहे.

वाघजाई हॉटेलमधील अनोळखी वेटर, कॅप्टन विरोधात याप्रकरणी चोरी आणि माहिती तंत्रज्ञान अधिनियमान्वये गुन्हा दाखल करण्यात आला आहे. याबाबत दयानंद प्रकाश किरोळकर (वय 30, रा. पुनावळे) यांनी वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी किरोळकर 7 जानेवारी रोजी दुपारी पिंपळे निलख येथील वाघजाई हॉटेलमध्ये जेवण करण्यासाठी गेले होते. जेवण झाल्यानंतर त्यांनी बिल भरण्यासाठी एटीएम कार्ड वेटरकडे दिले. वेटरने एटीएम कार्डचा डेटा क्लोन केला. तसेच पिन नंबरची चोरी केली. त्या माहितीच्या आधारे दुसरे एटीएम कार्ड तयार केले. बनावट एटीएम कार्ड द्वारे किरोळकर यांच्या बँक खात्यातून 38 हजार रुपये काढून घेतले.

असाच प्रकार आकाश रामेश्वर खोकर यांच्या सोबत देखील झाला आहे. त्यांच्या बँक खात्यातून 15 हजार 900 रुपये काढून घेण्यात आले. दोन्ही मिळून एकूण 53 हजार 900 रुपये वेटरने काढून घेतले.

भोसरी येथेही उघडकीस आला होता असा प्रकार –

उमेश देविदास अन्वेकर (वय 35, रा. पिंपळे गुरव, पुणे) लांडेवाडी चौकातील मधुबन हॉटेलमध्ये जेवण करण्यासाठी गेले. जेवण झाल्यानंतर त्यांनी बिल देण्यासाठी फिर्यादी यांनी डेबिट कार्ड दिले. अनोळखी आरोपी वेटरने फिर्यादी आणि हॉटेलमधील अन्य ग्राहकांची डेबिट कार्ड घेऊन डेटा क्लोन केला.

डेटा क्लोनिंग करून अनोळखी वेटरने फिर्यादी यांच्या खात्यातून 50 हजार, बाळासाहेब गणपतराव नजन यांच्या खात्यातून 25 हजार, प्रवीण बापू सोनार यांच्या खात्यातून 19 हजार 500 रुपये असे एकूण 94 हजार 500 रुपये चोरून फसवणूक केली. याबाबत भोसरी पोलीस ठाण्यात गुन्हा दाखल करण्यात आला होता.