Wakad crime News : दारू प्यायला पैसे न दिल्याने कोयत्याच्या धाकाने टोळक्याची दहशत
एमपीसी न्यूज – दारू प्यायला पैसे न दिल्याने सात जणांच्या टोळक्याने कोयते, दांडके हवेत फिरवून एकाला जबरदस्तीने लुटले. तसेच परिसरात दहशत निर्माण करून वाहनांची तोडफोड केली. हा प्रकार मंगळवारी (दि. 12) मध्यरात्री पावणे दोन वाजता रहाटणी परिसरात घडला.
विजय तलवारे, ऋषिकेश सूर्यवंशी, राजू उर्फ राजा पठाण, अजय निकम आणि त्यांचे दोन ते तीन साथीदार अशी गुन्हा दाखल झालेल्यांची नावे आहेत. याबाबत दशरथ तुकाराम भांडे (वय 34, रा. श्रीनगर, रहाटणी) यांनी वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपींनी फिर्यादी भांडे यांच्याकडे दारू प्यायला पैसे मागितले. पैसे देण्यासाठी भांडे यांनी नकार दिला. त्यावरून आरोपींनी कोयत्यासारखी हत्यारे, लाकडी दांडके हवेत फिरवून मोठमोठ्याने आरडाओरडा करत परिसरातील वाहनांच्या काचा फोडल्या.
‘कोण काय करतंय व कोण मधे येतंय ते बघतोच. त्यांना सोडणार नाही. कोणी मधे आले तर त्यांना खल्लास करू’, अशी धमकी देत आरडाओरडा करून परिसरात दहशत निर्माण केली. त्यानंतर भांडे यांच्या खिशातून आरोपींनी जबरदस्तीने एक हजार रुपये काढून घेतले.
वाकड पोलीस तपास करीत आहेत.