Wakad crime News : पत्नी, सासू आणि मेहुण्याच्या त्रासाला कंटाळून पतीची आत्महत्या

एमपीसी न्यूज – जमीन नावावर करून देण्याच्या कारणावरून पतीचा मानसिक छळ करून त्याला आत्महत्या करण्यास प्रवृत्त केले. त्यामुळे पतीने गळफास घेऊन आत्महत्या केली. याबाबत पत्नी, सासू आणि मेहुणा यांच्या विरोधात गुन्हा दाखल करण्यात आला आहे.

मनोज राजेंद्र पाटील, असे आत्महत्या केलेल्या पतीचे नाव आहे.

याबाबत राजेंद्र मिठाराम पाटील (वय 58, रा. भिलाली, ता. पारोळा, जि. जळगाव) यांनी वाकड पोलीस ठाण्यात फिर्याद दिली आहे. पत्नी रोशनी पाटील, सासू बेबाबाई हिरालाल पाटील, मेहुणा मयूर हिरालाल पाटील (सर्व रा. रत्नापिंप्री, ता. पारोळा, जि. जळगाव) अशी गुन्हा दाखल झालेल्यांची नावे आहेत.

पोलिसांनी दिलेल्या माहितीनुसार, हा प्रकार 2 जानेवारी 2019 पासून 13 डिसेंबर 2020 या कालावधीत सहकार नगर, ज्योतिबा नगर, काळेवाडी येथे घडला.

मयत मनोज यांच्या नावावर असलेली जमीन आरोपी पत्नी रोशनी हिच्या नावावर करून देण्याच्या कारणावरून पत्नी, सासू आणि मेहुणा यांनी मनोज यांचा मानसिक छळ केला. त्या छळाला कंटाळून मनोज यांनी काळेवाडी येथील घरी गळफास लावून आत्महत्या केली.

याबाबत 20 जानेवारी रोजी गुन्हा दाखल करण्यात आला आहे. वाकड पोलीस तपास करीत आहेत.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.