PM Modi Pune : श्रीमंत दगडूशेठ हलवाई गणपती चरणी ‘भारत विश्वगुरु व्हावा’ यासाठी पंतप्रधान मोदी यांनी केला संकल्प
एमपीसी न्यूज : देश का सपना, विश्वगुरू बने भारत अपना…असा ‘भारत विश्वगुरु व्हावा’ याकरिता (PM Modi Pune) महाभिषेकाप्रसंगी प्रधान संकल्प करीत पंतप्रधान नरेंद्र मोदी श्रीमंत दगडूशेठ हलवाई गणपतीचे दर्शन घेतले. ढोल ताशांच्या गजरात पारंपरिक पद्धतीने मंदिरात पंतप्रधान नरेंद्र मोदी याचे स्वागत झाले.
श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळातर्फे पंतप्रधान नरेंद्र मोदी यांचे भव्य स्वागत करण्यात आले. राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांसह ट्रस्टचे अध्यक्ष माणिक चव्हाण,उपाध्यक्ष सुनील रासने, कोषाध्यक्ष महेश सूर्यवंशी, सरचिटणीस हेमंत रासने उपस्थित होते.
ट्रस्टतर्फे दोन किलो वजनाची चांदीची गणरायाची मूर्ती, महावस्त्र, फळांची परडी आणि सुकामेवा देऊन पंतप्रधान नरेंद्र मोदी यांचा सन्मान करण्यात आला. पु.ना.गाडगीळ ज्वेलर्सचे पराग गाडगीळ, सौरभ गाडगीळ यांनी ही मूर्ती साकारली आहे.
मंदिर परिसरात छत्रपती शिवाजी महाराज रस्त्यावर भव्य कमानी व मंडप घालून मोदी यांचे स्वागत करण्यात आले. तसेच, मंदिराला फुलांची आकर्षक सजावट देखील करण्यात आली. स्वरूपवर्धिनी ढोल ताशा पथकाच्या वादनाने आणि ममता (PM Modi Pune) सकपाळ यांसह सुवासिनींनी औक्षण करून मराठमोळ्या पारंपरिक पद्धतीने त्यांचे स्वागत करण्यात आले.
भारत विश्वगुरु व्हावा याकरिता पंतप्रधान नरेंद्र मोदी यांनी महाभिषेकात संकल्प केला. याशिवाय पंचोपचार पूजा व महाआरती देखील झाली. वेदमूर्ती मिलिंद राहुरकर गुरुजी यांनी पौरोहित्य केले. मंदिराच्या संरक्षक भिंतीवर आतल्या बाजूने लावण्यात आलेल्या सामाजिक उपक्रमाच्या फलकांची पाहणी करीत त्यांनी विश्वस्तांकडून माहिती देखील जाणून घेतली.