2000 Banknote : 2000 रुपये मूल्याच्या 2.5 टक्के नोटा अजूनही जमा नाहीत
एमपीसी न्यूज – भारतीय रिजर्व बँकेने (Reserve Bank of India) 2000 रुपये मूल्य असलेल्या नोटा ( 2000 Banknote) चलनातून परत घेण्याचा निर्णय घेतला. या नोटा जमा करण्यासाठी दोन वेळा अवधी वाढवून देण्यात आला. तरी देखील आणखी 2.5 टक्के म्हणजेच 8 हजार 897 कोटी रुपयांच्या नोटा अजूनही बाजारात आहेत. याबाबत रिजर्व बँकेचे मुख्य महाव्यवस्थापक योगेश दयाल यांनी माहिती दिली.
नोव्हेंबर 2016 मध्ये 2000 मूल्य असलेल्या नोटा छापण्यात आल्या. तत्पूर्वी 500 आणि 1000 रुपयांच्या नोटा चलनातून बाद करण्यात आल्या. त्यामुळे बाजारात चलनाची आवश्यकता पूर्ण करण्यासाठी 2000 रुपयांची नोट छापण्यात आली. यामुळे अचानक उत्पन्न झालेली चलनाची कमी भरून काढता आली. त्यानंतर लगेच बाजारात इतर मूल्याच्या नोटा योग्य प्रमाणात आणण्यात आल्या. इतर मूल्यांच्या नोटांचे प्रमाण बाजारात योग्य होताच रिजर्व बँकेने 2000 मूल्याच्या नोटा परत घेण्याचा निर्णय घेतला.
Chinchwad : आदिवासी पाड्यावर संस्कार प्रतिष्ठानचा हळदी कुंकू समारंभ
19 मे 2023 रोजी याबाबत रिजर्व बँकेने घोषणा केली. सुरुवातीला 30 सप्टेंबर पर्यंत 2000 च्या नोटा सर्व बँकांमध्ये जमा करण्यास मुदत देण्यात आली. या मुदतीत पर्याप्त नोटा जमा न झाल्याने ही मुदत 7 ऑक्टोबर पर्यंत वाढवण्यात आली. तरीही पूर्णपणे नोटा जमा झाल्या नाहीत.
त्यामुळे आरबीआयने देशभरातील आपल्या अहमदाबाद, बेंगलोर, बेलापुर, भोपाळ, भुवनेश्वर, चंदिगढ, चेन्नई, गुवाहाटी, हैदराबाद, जयपुर, जम्मू, कानपुर, कोलकाता, लखनऊ, मुंबई, नागपुर, नवी दिल्ली, पटना आणि तिरुवनंतपुरम या 19 कार्यालयांमध्ये नोटा जमा करण्यास परवानगी दिली. तसेच भारतीय डाक विभागाच्या कोणत्याही पोस्ट ऑफिसमध्ये 2000 रुपयांची नोट जमा करता येणार आहे.
19 मे 2023 या दिवशी बाजारात 2000 रुपयांच्या नोटांचे मूल्य 3.56 लाख कोटी रुपये एवढे होते. आता बाजारात अवघे 8 हजार 897कोटी रुपये राहिले असून 97.5 टक्के नोटा परत घेण्यात आल्या आहेत. 2000 रुपयांची नोट अजूनही वैध मुद्रा आहे. आपल्याकडील 2000 रुपयांच्या नोटांना पोस्ट ऑफिस मध्ये जमा करता येणार ( 2000 Banknote) आहे.
