Pune : अखेर गणेशोत्सवात ध्वनिक्षेपक वापरासाठी सातव्या दिवशी परवानगी मिळाली

एमपीसी न्यूज – सार्वजनिक गणेश मंडळाला ध्वनी प्रदुषण संबंधी (Pune) नियमांचे पालन करुन गणेशोत्सवादरम्यान 5 ऐवजी 6 दिवस सकाळी 6 वाजल्यापासून ते रात्री 12 वाजेपर्यंत ध्वनिक्षेपक व ध्वनिवर्धकाचा वापर करण्यास परवानगी देण्याबाबतचा आदेश जिल्हाधिकारी डॉ. राजेश देशमुख यांनी दिला आहे. त्यानुसार सातव्या दिवशी (25 सप्टेंबर) रात्री बारा पर्यंत ध्वनिक्षेपक वापरता येणार आहे.

केंद्र शासनाच्या ध्वनी प्रदुषण (नियमन व नियंत्रण) सुधारित नियम 2017 अन्वये सण उत्सव कालावधीसाठी 15 दिवसांसाठी ध्वनीक्षेपक व ध्वनीवर्धकाच्या वापरासाठी सकाळी 6 वाजल्यापासून ते रात्री 12 वाजेपर्यंत वापर करण्यासाठी सूट देण्यात आली आहे.

त्यानुसार 16 फेब्रुवारी 2023 च्या जिल्हाधिकारी यांच्या आदेशानुसार सन 2023 च्या सण उत्सवांकरिता 13 दिवस निश्चित करुन 2 दिवस राखीव ठेवण्यात आले होते.

त्यामध्ये गणेशोत्सवाकरीता 5 दिवस निश्चित करण्यात आले होते.

तथापि, विविध लोकप्रतीनिधी व गणपती मंडळे यांनी पुणे शहरात (Pune) आणि जिल्ह्यात सार्वजनिक गणपती उत्सवामधील सातव्या दिवशी गणपती विसर्जन केले जात असल्याने सदर दिवसही विशेष बाब म्हणून वाढवून मिळण्याबाबत विनंती केली होती.

त्याबाबत पुणे ग्रामीण पोलीस अधीक्षकांनीही परवानगी देण्यात हरकत नसल्याचे कळविले आहे. त्यानुसार राखीव 2 दिवसांपैकी 1 दिवस गणेशोत्सवासाठी (गणेशोत्सवातील सातवा दिवस) सूट देण्याचे आदेश जिल्हाधिकारी डॉ. देशमुख यांनी जारी केले आहेत.

गणेशोत्सवासाठी यापूर्वीच्या आदेशानुसार शनिवार 23 सप्टेंबर (पाचवा दिवस- गौरी विसर्जन), रविवार 24 सप्टेंबर (सहावा दिवस), मंगळवार 26 सप्टेंबर (आठवा दिवस), बुधवार 27 सप्टेंबर (नववा दिवस), गुरुवार 28 सप्टेंबर (दहावा दिवस- अनंत चतुर्दशी) असे पाच दिवस ध्वनिक्षेपक व ध्वनिवर्धकाचा रात्री 12 वाजेपर्यंत वापर करण्यास परवानगी देण्यात आली होती.

आता नव्याने सोमवार 25 सप्टेंबर 2023 (सातवा दिवस) सह एकूण सहा दिवस नियमांचे पालन करून ध्वनिक्षेपक व ध्वनिवर्धकाचा रात्री 12 वाजेपर्यंत वापर करण्यास परवानगी देण्यात येत असल्याचे आदेशात नमूद करण्यात आले आहे.

तळेगावकरांसाठी आनंदाची बातमी

तळेगाव दाभाडे शहर आणि परिसरात सातव्या दिवशी गणेश विसर्जन केले जाते. तळेगाव शहरात विसर्जन मिरवणुका काढल्या जातात. मानाचे गणपती येऊन त्यांची मिरवणूक काढण्यासाठी रात्री उशीर होतो.

सातव्या दिवशी रात्री दहा पर्यंत ध्वनिक्षेपक वापरण्यास परवानगी असल्याने गणेश भक्तांचा उत्साह काहीसा कमी झाला होता. त्यानंतर गणेश मंडळे आणि आमदार सुनील शेळके यांनी देखील जिल्हाधिकारी डॉ. राजेश देशमुख यांच्याकडे सातव्या दिवशी रात्री बारा पर्यंत ध्वनिक्षेपक वापरण्यासाठी परवानगी द्यावी, अशी मागणी केली होती. सातव्या दिवशी जिल्हाधिकाऱ्यांनी परवनगी दिल्याने गणेश भक्तांमध्ये आनंदाचे वातावरण आहे.

Pimpri : सरकारी शाळा ‘कार्पोरेट’ला दत्तक देण्याचा निर्णय मागे घ्या – राहुल कोल्हटकर