Startup :स्टार्टअपच्या यशस्वीतेसाठी सूर्यदत्त संस्था करणार कायमस्वरूपी मार्गदर्शन
एमपीसी न्यूज – आत्मनिर्भर भारताचे स्वप्न साकार करायचे असेल, तर स्टार्टअप्स यशस्वी व्हायला हवेत. त्यासाठी आर्थिक (Startup) गुंतवणुकीच्या बरोबरीने विविध समस्यांची सोडवणूक आणि आव्हाने पेलण्यासाठी सक्षम मानसिकता असणे गरजेचे आहे. त्यामुळे सूक्ष्म नियोजन, सकारात्मक व धोरणी मानसिकता, पर्यायी मार्गांचा अवलंब करा,” असा सल्ला इंटरनेशनल सक्सेस कोच व माइंड पावर एक्सपर्ट सुनील पारेख, आणि ‘सूर्यदत्त’चे संस्थापक अध्यक्ष प्रा. डॉ. संजय बी. चोरडिया यांनी दिला.
शिक्षण, उद्योग, सामाजिक, आरोग्य आदी क्षेत्रांतील ४० वर्षांचा अनुभव असलेल्या प्रा. डॉ. संजय बी. चोरडिया यांच्या संकल्पनेतून हा उपक्रम राबविण्यात येणार आहे. सूर्यदत्त एज्युकेशन फाउडेशनच्या सूर्यदत्त इनोव्हेशन अँड आंत्रप्रेन्युअरशीप सेंटर ऑफ एक्सलन्सतर्फे (एसआयआयसीई) ‘आत्मनिर्भर भारतासाठी स्टार्टअप्स आणि यशस्वी स्टार्टअपसाठी सकारात्मक व धोरणी मानसिकता’ या विषयावर आयोजित कार्यक्रमात सुनील पारेख व प्रा. डॉ. संजय बी. चोरडिया बोलत होते.
‘सूर्यदत्त सेंटर फॉर इन्क्यूबेटिंग स्टार्टअप्स फॉर आत्मनिर्भर भारत’ची स्थापना केली असल्याचे यावेळी जाहीर करण्यात आले. तसेच या केंद्राच्या मार्फत नियमितपणे प्रत्येक महिन्याला स्टार्टअप्स विषयी मार्गदर्शनपर कार्यक्रम आयोजिला जाणार आहे.
“सूर्यदत्त शिक्षण संस्थेत गेल्या २५ वर्षांपासून सर्वांगीण विकासाचे रोजगाराभिमुख, उद्यमशील शिक्षण देण्यावर भर दिला जात आहे. सूर्यदत्त संस्थेतील अनेक विद्यार्थी आज यशस्वीपणे व्यवसाय चालवत आहेत. तरुणांना उद्योगांसाठी प्रोत्साहित करणे आणि त्यांना योग्य ते मार्गदर्शन करून त्यांच्या स्टार्टअपना यशस्वी उद्योगांत रूपांतर करण्यासाठी हे केंद्र व सुनील पारेख यांचे मार्गदर्शन उपयुक्त ठरेल. विद्यार्थ्यांच्या स्टार्टअपला गती व दिशा देण्याचे काम ‘सूर्यदत्त’च्या वतीने करण्यात येणार आहे. त्यासाठी विविध क्षेत्रातील तज्ज्ञ, यशस्वी स्टार्टअप उभारणाऱ्या व प्रयत्न केलेल्या व्यक्तींना बोलावून मार्गदर्शन केले जाणार आहे. शालेय जीवनापासून विद्यार्थ्यांना सूर्यदत्तमध्ये स्टार्टअप्सचे धडे दिले जाणार आहेत,” असेही प्रा. डॉ. संजय बी. चोरडिया यांनी यावेळी सांगितले.
यशस्वी स्टार्टअपसाठी काही टिप्स
– नाविन्यपूर्ण कल्पनांना विकसित करण्याची तयारी ठेवावी
– सशक्त व सकारात्मक मानसिकता असायला हवी
– प्रामाणिक कष्टाची तयारी, सूक्ष्म नियोजन, नैतिकता हवी
– इतरांशी तुलना न करता आत्मपरिसक्षण करून निर्णय घ्यावा
– तज्ज्ञांचे मार्गदर्शन घ्यावे, अधिक गुंतवणुकीला प्राधान्य देऊ नये
– प्रायोगिक तत्वावर सुरुवात करून मग त्याला व्यापक करावे
– संशोधन व विकास विभाग करून सखोल ज्ञान घ्यावे
– विविध क्षेत्रांमध्ये स्टार्टअप करण्याची संधी आहे
– आपण मार्केटचा अभ्यास करून त्याची निवड करावी
– गुंतवणूक, कर्ज याचा अचूक अभ्यास असावा
– कायदेशीर मान्यता, पारदर्शकता व स्पष्टता ठेवावी
– स्पर्धात्मक माहिती घ्यावी, प्रकल्प अहवाल बनवून त्याप्रमाणे काम करावे
– आर्थिक परीक्षण व स्टार्टअपच्या कामाचे अवलोकन नियमित करावे