Chinchwad : राष्ट्रीय स्वयंसेवक संघाच्या वतीने शहरात 22 ठिकाणी विजयादशमी उत्सवाचे आयोजन
एमपीसी न्यूज – पिंपरी चिंचवड राष्ट्रीय स्वयंसेवक संघातर्फे (Chinchwad) पिंपरी-चिंचवड शहरात विजयादशमी उत्सवाचे आयोजन करण्यात आले आहे. यानिमित्त शहरातील 22 ठिकाणी विविध वक्त्यांची व्याख्याने होणार आहेत.
शनिवारी (दि. 21) संभाजीनगर भागात, रविवारी (दि. 22) शहरातील 20 ठिकाणी तर शनिवारी (दि. 28) हिंजवडी येथे विजयादशमी उत्सव व्याख्यानाच्या माध्यमातून साजरा केला जाणार आहे. राष्ट्रीय स्वयंसेवक संघातर्फे दरवर्षी विजयादशमी उत्सवाचे आयोजन केले जाते. यावर्षी पिंपरी चिंचवड शहरातील 22 विविध भागात मोठ्या संख्येने स्वयंसेवक, नागरिक या उत्सवात सहभागी होणार असल्याचे आयोजकांकडून सांगण्यात आले.
संभाजीनगर, देहूरोड, देहूगाव, निगडी, चिखली, पिंपळे सौदागर, पिंपळे निलख, काळेवाडी, पिंपरी, चिंचवड पूर्व, चिंचवड (Chinchwad) पश्चिम, रावेत, आकुर्डी, वाकड, पुनावळे, थेरगाव, हिंजवडी, इंद्रायणीनगर, दिघी, भोसरी, चऱ्होली, आळंदी, संत तुकाराम नगर, कासारवाडी, पिंपळे गुरव, सांगवी आदी ठिकाणी कार्यक्रम (Chinchwad) होणार आहेत.
Wakad : दुभाजकाला धडकून रिक्षा चालकाचा मृत्यू
या वेळी शारीरिक प्रात्यक्षिके, घोष (बँड) वादन, राष्ट्रभक्तीपर गीते या सामूहिक कार्यक्रमांसह पारंपरिक शस्त्रपूजन झाल्यानंतर वक्त्यांचे मार्गदर्शन होणार आहे. विविध क्षेत्रांतील मान्यवर प्रामुख्याने उपस्थित राहणार आहेत. त्याचबरोबर विजयादशमी दिवशी शहरातील विविध भागात पथसंचलन होणार आहे. याबाबतची माहिती पिंपरी चिंचवड जिल्हा संघचालक विनोद बन्सल यांनी दिली आहे.