Pimpri : नैवेद्याची पुरणपोळी भुकेलेल्या लोकांना दान; रॉबिनहुड आर्मीचा होळीच्या दिवशी उपक्रम
शहरातील 95 सोसायट्यांमधून जमा झाल्या 5,900 पुरणपोळ्या
एमपीसी न्यूज – होळीच्या सणाला पुरणपोळीचा नैवेद्य दाखवुन हा सण साजरा केला जातो. परंतु वाया जाणारे अन्न गरजूंपर्यंत पोहोचवण्याचे काम करणाऱ्या रॉबिनहुड आर्मी संस्थेच्या पिंपरी-चिंचवड शाखेतर्फे या पुरणपोळ्या दान करा, असे आवाहन करण्यात आले होते. या उपक्रमाला चांगलाच प्रतिसाद मिळाला व शहरातील 95 सोसायट्यांनी यामधे सहभाग नोंदवत 5,900 पुरणपोळ्या दान करण्यात आल्या.
रुढी व परंपरा जपत शास्त्रासाठी एक तुकडा होळीत टाकून उरलेली पुरणपोळी दान करा, यासाठी सोशल मीडिया तसेच सोसायट्यांमध्ये जाऊन या उपक्रमाविषयी माहिती देण्यात आली होती. या उपक्रमास भरभरुन प्रतिसाद मिळाला व 95 सोसायट्यां मधून तब्बल 5,900 पुरणपोळ्या दान करण्यात आल्या तसेच विविध दात्यांकडे जाऊन पोळ्या जमा केल्या. जमा केलेल्या पुरणपोळ्यांचे पिंपरी- चिंचवड व पुणे स्टेशनसह 26 ठिकाणी वाटप करण्यात आले.