सातवीत शिकणारा सराईत चोरटा पुन्हा पोलिसांच्या ताब्यात; दोन दुचाकींसह चार मोबाईल हस्तगत
एमपीसी न्यूज – सिंहगड पोलिसांनी 8 फेब्रुवारी रोजीच चोरीच्या प्रकरणात ताब्यात घेतलेल्या सातवीच्या वर्गात शिकत असलेल्या विद्यार्थ्यास पुन्हा एकदा चोरी केल्याप्रकरणी ताब्यात घेतले आहे. यावेळी त्याच्या ताब्यातून 2 दुचाकी आणि 4 मोबाईल जप्त करण्यात आले आहेत.
सिंहगड पोलीस गस्त घालत असताना संबंधित विद्यार्थी होंडा अॅक्टिव्हा दुचाकीने भरधाव वेगाने जात असताना पोलिसांनी त्याला ताब्यात घेऊन चौकशी केली असता त्याने पुन्हा 2 दुचाकी आणि 4 मोबाईल चोरल्याची कबुली दिली. या विद्यार्थ्यांकडून एकाच महिन्यात चोरीच्या 3 दुचाकी व 8 मोबाईल हस्तगत करण्यात आले आहेत.
आरोपीने आज जप्त केलेल्या दुचाकीपैकी एक दुचाकी धायरीतील सर्व्हिसिंग सेंटरमधून चोरली तर दुसरी वडगाव येथील उमा हाऊसिंग सोसायटीच्या पार्किंगमध्यून चोरल्याची कबुली दिली.
