Pimpri: शहरातील गुरुवारी सायंकाळचा पाणीपुरवठा बंद, शुक्रवारचा विस्कळीत
एमपीसी न्यूज – जुशुद्धीकरण केंद्र सेक्टर क्रमांक 23 निगडीतील मुख्य जलवाहिनीच्या दुरुस्तीच्या कामासाठी गुरुवारी (दि.19) पाणीपुरवठ्याची यंत्रणा बंद ठेवण्यात येणार आहे. गुरुवारी सकाळचा पाणीपुरवठा केल्यानंतर दुरुस्तीच्या कामामुळे संध्याकाळाचा पाणीपुरवठा होणार नाही. शुक्रवारी (दि.20) सकाळचा पाणीपुरवठा विस्कळीत राहणार असल्याचे पिंपरी महापालिकेच्या पाणीपुरवठा विभागाने सांगितले आहे.
मावळातील पवना धरणातून पिंपरी-चिंचवकरांना पाणीपुरवठा केला जातो. रावेत येथील बंधा-यातून अशुद्ध जलउपसा करण्यात येतो. सेक्टर 23 येथे पाणी शुद्ध करुन शहरवासीयांना पुरवठा केला जातो. पिंपरी महापालिकेच्या रावेत येथील अशुद्ध जलउपसा केंद्रापासून जुशुद्धीकरण केंद्र सेक्टर क्रमांक 23 निगडी येथे येणारी मुख्य जलवाहिनीची गळती झाल्याने दुरुस्तीची काम हाती घेतले जाणार आहे. त्यासाठी गुरुवारी (दि.19) शहरातील पाणीपुरवठ्याची यंत्रणा बंद ठेवण्यात येणार आहे.
महापालिकेमार्फत गुरुवारी सकाळचा पाणीपुरवठा केला जाईल. परंतु, त्यानंतर दुरुस्तीच्या कामामुळे शहरातील सर्व भागांचा संध्याकाळाचा पाणीपुरवठा होणार नाही. दुरुस्तीच्या कामासाठी पाणीपुरवठ्याची सर्व यंत्रणा बंद ठेवल्यामुळे शहरातील सर्व भागात दुस-या दिवशी म्हणजेच शुक्रवारी (दि.20) सकाळचा पाणीपुरवठा विस्कळीत राहण्याची शक्यता आहे. त्यामुळे नागरिकांनी पाण्याचा काटकसरीने वापर करण्याचे आवाहन महापालिकेच्या पाणीपुरवठा विभागाने केले आहे.
