Punawale : पुनावळे घनकचरा व्यवस्थापन प्रकल्पाच्या विरोधात नागरिकांचे चिपको आंदोलन
पिंपरी-चिंचवड महापालिकेने पुनावळे मधील काटेवस्ती येथे (Punawale)असलेल्या जंगल परिसरात घनकचरा व्यवस्थापन प्रकल्प उभारण्याच्या हालचाली सुरु केल्या आहेत. वनविभागाची 26 हेक्टर जागा पालिकेला मिळाली असून सन 2008 मध्ये या जागेवर कचरा डेपोसाठी आरक्षण टाकण्यात आले आहे. मोशी येथील कचरा डेपो भरल्याने पालिकेने कचरा डेपोसाठी ही पर्यायी सोय केली आहे. मात्र या प्रस्तावित कचरा डेपोच्या आजूबाजूला पूर्णपणे नागरी वस्ती झाली आहे. दाट लोकवस्ती असल्याने इथे कचरा डेपो करू नये, अशी पुनावळे, ताथवडे, मारुंजी आणि पंचक्रोशीतील नागरिकांची मागणी आहे.
याच मागणीसाठी पिंपरी चिंचवड को ऑपरेटिव्ह सोसायटी फेडरेशन आणि पुनावळे रेसिडेंट्स एसोसिएशन यांच्या संयुक्त विद्यमाने रविवारी सकाळी बाईक रॅली काढण्यात आली. पुनावळे आमच्या हक्काचं-नाही कुणाच्या बापाचं, कचरा डेपो हटाव-पुनावळे बचाव, कचरा डेपो हटवा-पुनावळे वाचवा, अशा घोषणा देत शेकडो नागरिकांनी या रॅलीमध्ये सहभाग घेतला.
18 लॅटीट्यूड मॉल पुनावळे येथून या रॅलीला सुरुवात झाली. ही रॅली पुढे कोयते वस्ती, शिंदे वस्ती, लाईफ रिपब्लिक सोसायटी मारुंजी, लक्ष्मी चौक, भूमकर चौक, ताथवडे सर्व्हिस रोड, पुनावळे, कोयते वस्ती मार्गे काटे वस्ती येथील जंगल परीसरात आली. जंगलातील प्रत्येक झाडाला आलिंगन देत नागरिकांनी चिपको आंदोलन केले. कचरा डेपो करण्यासाठी झाडे तोडावी लागणार. त्यामुळे इथल्या निसर्गाचा ऱ्हास होणार असल्याने हा विरोध करण्यात आला.
पालिकेने सन 2008 साली या जागेवर कचरा डेपोसाठी आरक्षण टाकले. मात्र त्यावेळी या परिसरात नागरीकरण झालेले नव्हते. आता प्रस्तावित कचरा डेपोच्या आजूबाजूच्या परिसरात लाखो नागरिक वास्तव्यास आले आहेत. प्रस्तावित कचरा डेपोपासून काही मीटर अंतरापर्यंत सोसायट्या झाल्या आहेत. त्यामुळे इथे कचरा डेपो सुरु झाल्यास इथल्या नागरिकांचे आरोग्य धोक्यात येणार असल्याच्या भावना नागरिक व्यक्त करीत आहेत.