Talegaon Crime : उसन्या पैशांच्या वादावरून अभिनेते प्रणव जोशी यांना जीवे मारण्याची धमकी
एमपीसी न्यूज – उसने घेतलेले पैसे मागितल्याच्या कारणावरून एकाने अभिनेते प्रणव जोशी यांना जीवे मारण्याची धमकी दिली. हा प्रकार तळेगाव दाभाडे येथे घडला आहे.
प्रणव रघुनाथ जोशी (वय 32, रा. कडोलकर कॉलनी, तळेगाव दाभाडे) यांनी याप्रकरणी तळेगाव दाभाडे पोलीस ठाण्यात फिर्याद दिली आहे. त्यानुसार गौरव बाळकृष्ण चिखले (रा. खेड) याच्या विरोधात अदखलपात्र गुन्हा दाखल करण्यात आला आहे.
पोलिसांनी दिलेल्या माहितीनुसार अभिनेते प्रवण जोशी यांनी आरोपी गौरव चिखले याला काही पैसे उसने दिले होते. त्यातील काही रक्कम चिखले याने जोशी यांना दिली होती. तर काही रक्कम शिल्लक होती. 25 सप्टेंबर रोजी दुपारी साडेतीन वाजताच्या सुमारास जोशी यांनी चिखले याला राहिलेले उसने पैसे देण्याची मागणी केली.
त्यावरून चिखले याने जोशी यांना शिवीगाळ करत जीवे मारण्याची धमकी दिली. या प्रकाराबाबत जोशी यांनी माहिती अधिकार कार्यकर्ते व महाराष्ट्र भ्रष्टाचार निर्मूलन समितीचे पुणे जिल्हाध्यक्ष प्रदीप नाईक यांना माहिती दिली. नाईक यांनी तळेगाव दाभाडे पोलीस स्टेशनचे वरिष्ठ पोलीस निरीक्षक अमरनाथ वाघमोडे यांच्याशी संपर्क साधला.
प्रकरणाचे गांभीर्य लक्षात घेऊन वाघमोडे यांनी तातडीने गुन्हा दाखल करून कारवाई करण्याच्या सूचना दिल्या. त्यानुसार याबाबत 3 ऑक्टोबर रोजी पोलीस ठाण्यात तक्रार नोंदवण्यात आली आहे. तळेगाव दाभाडे पोलीस तपास करीत आहेत.
