Pimpri: शिष्यवृत्ती परीक्षेच्या पुस्तिकेवर साडेबारा लाखांचा खर्च
एमपीसी न्यूज – पिंपरी-चिंचवड महापालिकेच्या शाळेतील पाचवी व आठवीचे विद्यार्थी शिष्यवृत्ती परीक्षेस बसतात. त्या 2 हजार 670 विद्यार्थ्यांना शिष्यवृत्ती परीक्षेची अभ्यासपुस्तिका संच खरेदीसाठी 12 लाख 50 हजार रूपयांचा खर्च केला जाणार आहे.
राज्य शासनातर्फे पाचवी व आठवीच्या विद्यार्थ्यांसाठी शिष्यवृत्ती परीक्षा दरवर्षी घेतली जाते. पालिका शाळेचे विद्यार्थीही या परीक्षेला बसतात. या विद्यार्थ्यांची आर्थिक परिस्थिती चांगली नसल्याने ते शिष्यवृत्तीची पुस्तिका संच खरेदी करू शकत नाहीत.
त्यामुळे 2019-20 या शैक्षणिक वर्षासाठी त्या होतकरू व गरीब विद्यार्थ्यांना पुस्तके खरेदी करून मोफत देण्यात येणार आहेत. या पुस्तक खरेदीचा ठराव शिक्षण समितीने मंजुर केला आहे. या खर्चास स्थायी समिती सभेत मान्यता देण्यात आली.