Pune News : ‘पुरुषोत्तम करंडक 2022 ची महाअंतिम फेरी 24 डिसेंबरपासून पुण्यात रंगणार
एमपीसी न्यूज : महाराष्ट्रीय कलोपासकतर्फे आयोजित ‘पुरुषोत्तम करंडक 2022’ या आंतरमहाविद्यालयीन एकांकिका स्पर्धेची महाअंतिम फेरी येत्या (Pune News) 24 डिसेंबरपासून पुण्यात रंगणार आहे. पुण्यासह रत्नागिरी, कोल्हापूर, जळगाव-औरंगाबाद आणि अमरावती-नागपूर विभागातील 18 संघांमध्ये ‘पुरुषोत्तम’चा महाकरंडक पटकावण्यासाठी यावेळी चुरस रंगेल.
सदाशिव पेठेतील भरत नाट्य मंदिर येथे 24 ते 26 डिसेंबर या कालावधीत सकाळी 9 ते 1 व सायंकाळी 5 ते 9 अशा दोन सत्रांमध्ये स्पर्धा होणार आहे. प्रत्येक सत्रात चार संघांचे सादरीकरण होणार आहे. तर, 26 डिसेंबरला सायंकाळच्या सत्रात बक्षीस वितरण समारंभ पार पडेल.(Pune News) पुणे व अमरावती-नागपूर विभागात सर्वोत्कृष्ट प्रायोगिक एकांकिकेचा करंडक कोणालाच न मिळाल्याने या विभागातून केवळ प्रथम तीन क्रमांकाचे संघ महाअंतिम फेरीसाठी पात्र ठरले आहेत. तर, रत्नागिरी, कोल्हापूर आणि जळगाव-औरंगाबाद विभागातून प्रत्येकी चार संघ महाअंतिम फेरीत दाखल झाले आहेत.
पुणे विभागाच्या प्राथमिक फेरीत पुरुषोत्तम करंडक कोणालाही न देण्याचा ऐतिहासिक निर्णय परीक्षकांनी घेतला होता. पुणे इन्स्टिट्यूट ऑफ कॉम्प्युटर टेक्नॉलॉजी (पीआयसीटी) या संघाच्या ‘कलीगमन’ या एकांकिकेला करंडक न देता केवळ प्रथम क्रमांक देण्यात आला होता.(Pune News) या निर्णयाची चांगलीच चर्चा रंगली होती. मात्र करंडक मिळाला नसला तरी महाअंतिम फेरीत ‘पीआयसीटी’चा संघ तुळजाराम चतुरचंद महाविद्यालय, बारामती आणि मॉडर्न कला, शास्त्र व वाणिज्य स्वायत्त महाविद्यालय यांच्यासह संघ पुणे विभागाचे प्रतिनिधित्व करेल.
