Mahavitaran : महावितरणच्या कर्मचाऱ्यांचा कौटुंबिक सांस्कृतिक स्नेहमेळावा संपन्न
एमपीसी न्यूज – महावितरणच्या पुणे परिमंडलातील (Mahavitaran) अधिकारी व कर्मचाऱ्यांचा कौटुंबिक स्नेहमेळावा गुरुवारी (दि. 16) येथील अल्पबचत भवनात उत्साहात साजरा झाला. वीजग्राहकांना अविश्रांत सेवा देणाऱ्या अधिकारी, कर्मचाऱ्यांनी यात सहभाग घेतला होता.
या स्नेहमेळाव्यात प्रादेशिक संचालक (प्र.) अंकुश नाळे, मुख्य अभियंता राजेंद्र पवार, महाव्यवस्थापक (वित्त) अलोक गांगुर्डे, अधीक्षक अभियंता सर्वश्री प्रकाश राऊत, सतीश राजदीप, शंकर तायडे, डॉ. सुरेश वानखेडे, पुनम रोकडे, उपमहाव्यवस्थापक (मासं) अभय चौधरी, उपमुख्य औद्योगिक संबंध अधिकारी शिरीष काटकर (पुणे), श्रीकृष्ण वायदंडे (बारामती) यांच्यासह परिमंडलातील अभियंता, अधिकारी, कर्मचारी कुटुंबियांसह सहभागी झाले होते.
Pune : सोमवारी पुण्याच्या ‘या’ भागात राहणार पाणी पुरवठा बंद
महावितरणच्या वर्धापनदिनासह कर्मचाऱ्यांचा कौटुंबिक स्नेहमेळावा (Mahavitaran) व मनोरंजनपर असे वर्षभरात दोन कार्यक्रम घेण्यात येतात. यंदा पुणे परिमंडलाने राज्यस्तरीय क्रीडास्पर्धेत सर्वसाधारण विजेतेपद तसेच नाट्यस्पर्धेत द्वितीय क्रमांकाचा करंडक पटकावला आहे. यातील विजेत्यांचा गुणगौरव करण्याचे औचित्य साधून पुणे परिमंडलातील अधिकारी व कर्मचाऱ्यांसाठी सायंकाळी साडे सहा ते रात्री दहा वाजेपर्यंत कौटुंबिक स्नेहमेळाव्याचे आयोजन करण्यात आले.
या कार्यक्रमात राज्यस्तरीय क्रीडा व नाट्यस्पर्धेतील विजेत्या खेळाडू व नाट्यकलांवतांचा तसेच शैक्षणिक प्राविण्य मिळविणाऱ्या कर्मचाऱ्यांच्या पाल्यांचा गुणगौरव करण्यात आला. यानंतर हिंदी व मराठी गाण्यांच्या संगीत रजनीचा कार्यक्रम झाला. कार्यक्रमाचे सूत्रसंचालन डॉ. संतोष पटनी, संतोष गहेरवार यांनी केले तर वरिष्ठ व्यवस्थापक अपर्णा माणकीकर यांनी आभार मानले.
