Nigdi : एका दुचाकीस्वाराकडून दोन किलो गांजा जप्त; अंमली पदार्थ विरोधी पथकाची कारवाई
एमपीसी न्यूज – अंमली पदार्थ विरोधी पथकाने एका दुचाकीस्वाराकडून दोन किलो गांजा जप्त केला आहे. ही कारवाई गुरुवारी (दि. 12) रात्री काचघर चौकात करण्यात आली. पोलिसांनी याप्रकरणी एकाला अटक केली आहे.
सचिन शंकर पवार (वय 26 रा. काळभोरगोटा, निगडी) असे अटक केलेल्या आरोपीचे नाव आहे. पोलीस शिपाई अजित लिंबराज कुटे यांनी याप्रकरणी फिर्याद दिली आहे.
पोलिसांनी दिलेल्या माहितीनुसार, निगडीमधील काचघर चौकात एक तरुण गांजा घेऊन येणार असल्याची माहिती पिंपरी-चिंचवड गुन्हे शाखेच्या अंमली पदार्थ विरोधी पथकाला मिळाली. पोलिसांनी परिसरात सापळा रचून सचिन याला ताब्यात घेतले.
त्याची झडती घेतली असता त्याच्या जवळ सुमारे 2 किलो 125 ग्रॅम वजनाचा अंदाजे 53 हजार 125 रुपयांचा गांजा आढळून आला. पोलिसांनी गांजासह गुन्ह्यासाठी वापरलेली 30 हजार रुपयांची दुचाकी व रोख 400 रुपये पोलिसांनी जप्त केले. निगडी पोलीस तपास करीत आहेत.