Pune : दाक्षिणात्य अभिनेते मोहनलाल यांची एक हजार पीपीई किटची पुणे महापालिकेला मदत
एमपीसीन्यूज : प्रसिद्ध दाक्षिणात्य अभिनेते मोहनलाल यांनी पुणे महापालिकेच्या आरोग्य सेवकांसाठी एक हजार व्यक्तिगत संरक्षक पोशाख अर्थात पीपीई किट्सची भेट दिली आहे. राष्ट्रीय स्वयंसेवक संघ जनकल्याण समिती आणि पुणे महानगरपालिका यांच्या संयुक्त विद्यमाने सुरू असलेल्या आरोग्य रक्षा सेवा अभियानासाठी मोहनलाल यांनी ही मदत केली आहे.
मोहनलाल यांच्या विश्वशांती फाऊंडेशनतर्फे ‘सांस्कृतिक वार्तापत्र’च्या व्यवस्थापिका सुनीता पेंढारकर यांनी महापौर मुरलीधर मोहोळ यांच्याकडे हे पीपीई किट्स सुपूर्द केले. यावेळी राष्ट्रीय स्वयंसेवक संघाचे महानगर कार्यवाह महेश करपे, जनकल्याण समितीचे पुण्यातील कार्यवाह अश्विनीकुमार उपाध्ये, महापालिका आयुक्त शेखर गायकवाड, अतिरिक्त आयुक्त रुबल अगरवाल, महापालिका स्थायी समितीचे अध्यक्ष हेमंत रासने आदी उपस्थित होते.
हे किट्स उपलब्ध करून देण्यासाठी औरंगाबाद स्थित डॉ. हेडगेवार रुग्णालयाचे संचालक डॉ. अनंत पंढरे, धनंजय काळे यांचा मोलाचा वाटा आहे. आरोग्य रक्षा सेवा अभियानातंर्गत २५ एप्रिल २० पासून रेड झोन मध्ये नागरिकांची आरोग्य तपासणी केली जाते आहे.
आतापर्यंत ५३ हजारांहून अधिक नागरिकांची आरोग्य तपासणी करण्यात आली असून त्यातील ८८५ नागरिकांची पुढील तपासणीसाठी शिफारस करण्यात आली आहे.
दाक्षिणात्य चित्रपट सृष्टीवर मोहनलाल चार दशकाहून अधिक काळ अधिराज्य गाजवत आहेत. सध्या करोनाविरोधातील लढाईत अग्रेसर असलेल्या आरोग्य सेवकांसाठी पीपीई किट्सची गरज आहे. मोहनलाल यांनी सामाजिक जाणीवेतून केलेल्या पीपीई किट्सच्या मदतीसाठी पुणेकर त्यांचे आभारी आहेत, असे महापौर मोहोळ यांनी सांगितले.
